TCSને BSNL તરફથી રૂપિયા 15000 કરોડનો મળ્યો મોટો ઓર્ડર, દેશભરમાં 4G નેટવર્ક શરૂ કરવાની યોજના

દેશની સૌથી મોટી સોફ્ટવેર કંપની Tata Consultancy Services (TCS) ને ભારત સંચાર નિગમ લિમિટેડ એટલે કે BSNL તરફથી 15000 કરોડ રૂપિયાનો જંગી ઓર્ડર મળ્યો છે. BSNL દેશમાં 4G લોન્ચ કરવાની યોજના બનાવી રહી છે, જેના માટે કંપનીએ TCS-ની આગેવાની હેઠળના કન્સોર્ટિયમ સાથે ઓર્ડર આપ્યો છે. આ સોદો ભારતના સૌથી મોટા સોફ્ટવેર એક્સપોર્ટરને એવા સમયે મદદ કરશે જ્યારે યુએસ અને યુરોપ જેવા તેના મુખ્ય બજારો મંદીમાંથી પસાર થઈ રહ્યા છે. TCS એ સોમવારે એક નિવેદનમાં જણાવ્યું હતું કે તેને BSNL તરફથી 15,000 કરોડ રૂપિયાનો 'એડવાન્સ પરચેઝ ઓર્ડર' (APO) મળ્યો છે.

કન્સોર્ટિયમમાં છે આ કંપનીઓ

આ કન્સોર્ટિયમમાં ટાટા ગ્રૂપની ટેલિકોમ ગિયર મેકર તેજસ નેટવર્ક પણ સામેલ છે. તે રેડિયો એક્સેસ નેટવર્ક (RAN) સાધનોના સપ્લાય અને સર્વિસિંગ માટે કામ કરશે. આ પ્રોજેક્ટ માટે TCSની સાથે ITI લિમિટેડને APO પણ જારી કરવામાં આવ્યો હતો. વિશ્લેષકોના મતે લગભગ 20 ટકા કામ અને ડીલનું મૂલ્ય ITIને જશે.

TCS દેશની સૌથી મોટી સોફ્ટવેર કંપની

TCS દેશની સૌથી મોટી સોફ્ટવેર એક્સપોર્ટર છે. કંપનીની કુલ આવકમાં લોકલ માર્કેટનો હિસ્સો પાંચ ટકાથી વધુ છે. BSNL મુંબઈ અને નવી દિલ્હી સિવાય દેશભરમાં ફિક્સ લાઇન અને મોબાઈલ સર્વિસ પૂરી પાડે છે. પ્રાઇવેટ સેક્ટરની ટેલિકોમ કંપનીઓ પહેલેથી જ 4G સેવાઓ પ્રદાન કરી રહી છે અને કેટલાકે પસંદગીના વિસ્તારોમાં 5G ઓફર કરવાનું શરૂ કર્યું છે.

આ પણ વાંચો-ગ્રોથમાં સુસ્તીના કારણે હાઈ વેલ્યુએશન પર ફંડ ભેગુ કરનાર એડટેક સ્ટાર્ટઅપ્સની ચિંતામાં વધારો