કોમોડિટી લાઇવ: ક્રૂડમાં રિકવરી, બ્રેન્ટ $85ની ઉપર, USના નબળાં આંકડાઓથી સોના-ચાંદીમાં તેજી

ડૉલર ઇન્ડેક્સ અને ટ્રેઝરી યીલ્ડમાં ઘટાડાથી સોનાની કિંમતોને સપોર્ટ મળતા COMEX પર ભાવ 1936 ડૉલરના સ્તરની પાસે પહોંચતા દેખાયા, જ્યારે સ્થાનિક બજારમાં 59,340ના સ્તરની આસપાસ કારોબાર જોવા મળી રહ્યો છે. ઉલ્લેખનિય છે કે સપ્ટેમ્બરમાં ફેડ તરફથી વ્યાજ દરમાં વધારો ન થાય તેવી સંભાવનાએ સોનામાં સેફ હેવન બાઈંગ વધતું દેખાયું છે, જેનો સપોર્ટ કિંમતોને મળી રહ્યો છે.

સોના સાથે ચાંદીની કિંમતો પણ વધતી દેખાઈ, જ્યાં વૈશ્વિક બજારમાં 24 ડૉલરની ઉપર કિંમતો પહોંચી,તો સ્થાનિક બજારમાં 74,598ના સ્તરની આસપાસ કારોબાર જોવા મળી રહ્યો છે.

ઓછા સ્ટોક અને હરિકેનની ચિંતાના કારણે ક્રૂડ ઓઈલમાં નીચલા સ્તરેથી ફરી રિકવરી જોવા મળી, અહીં આજે બ્રેન્ટમાં 85 ડૉલરની ઉપર કારોબાર થઈ રહ્યો છે, તો NYMEX ક્રૂડમાં પણ આશરે અડધા ટકાની તેજી સાથે 81 ડૉલરની ઉપર કિંમતો પહોંચતી દેખાઈ, જ્યારે સ્થાનિક બજારમાં પણ પોઝિટીવિટી દેખાઈ રહી છે. ઉલ્લેખનિય છે કે, APIના રિપોર્ટ મુજબ US ક્રૂડ ઇન્વેન્ટરી 11.5 મિલિયન બેરલથી ઘટી છે, જે અનુમાન કરતા વધારે છે, અને તેનો જ સપોર્ટ આજે કિંમતોને મળી રહ્યો છે.

નેચરલ ગેસમાં વોલેટાલિટી યથાવત્ છે, આજે સ્થાનિક બજારમાં ફરી નીચલા સ્તરેથી આશરે 1 ટકાથી વધુની રિકવરી સાથે 222ના સ્તરની આસપાસ કારોબાર થઈ રહ્યો છે.

નજર કરીએ એગ્રી કૉમોડિટીના કારોબાર પર તો, મસાલા પેકમાં ધાણામાં પા ટકાથી વધુની તેજી રહી, પણ હળદર અને જીરામાં નરમાશ જોવા મળી રહી છે. પણ ગઈકાલની નરમાશ બાદ ગુવાર પેકમાં એક ટકાથી વધુની તેજી રહી, જ્યારે એરંડામાં દબાણ સાથેનો કારોબાર યથાવત્ છે. જોકે કપાસિયા ખોળમાં લગભગ એક ટકા જેટલી મજબૂતી દેખાઈ રહી છે.

HERO MOTOCORP નો સ્ટૉક આજે ફોક્સમાં, જાણો બ્રોકરેજ ફર્મોની સ્ટૉક પર સલાહ