કોમોડિટી લાઇવ: ક્રૂડમાં દબાણ, બ્રેન્ટ $88ની પાસે, સોના-ચાંદી તરફથી મિશ્ર સંકેતો, બેઝ મેટલ્સમાં નીચલા સ્તરેથી રિકવરી

ઓછી સપ્લાય અને માગ ઘટવાની આશંકાએ ક્રૂડમાં સતત ત્રીજા દિવસે ઘટાડો જોવા મળ્યો, જ્યાં બ્રેન્ટમાં 88 ડૉલરની પાસે કિંમતો પહોંચી, તો NYMEX ક્રૂડમાં પણ નાની રેન્જમાં કામકાજ જોવા મળી રહ્યું છે. ઉલ્લેખનિય છે કે US ઇન્વેન્ટરીમાં ઘટાડો અને યુરોપ અને યુરોઝોન તરફથી નબળા PMI આંકડાઓના કારણે ક્રૂડની માગ ઘટવાના અનુમાન બની રહ્યા છે, જેને કારણે ગઈકાલે કિંમતોમાં આશરે 2%નો ઘટાડો નોંધાયો, APIના આંકડા મુજબ US ઇન્વેન્ટરીમાં 2 મિલિયન બેરલથી વધુનો ઘટાડો નોંધાયો, જેની પણ નેગેટીવ અસર કિંમતો પર બની રહી છે.

સ્થાનિક બજારમાં નેચરલ ગેસમાં અડધા ટકા જેટલ તેજી આવતા 246ના સ્તરની આસપાસ કારોબાર જોવા મળી રહ્યો છે.

શરૂઆતી કારોબારમાં ચાંદીની કિંમતોમાં નરમાશ રહેતા વૈશ્વિક બજારમાં ભાવ 23 ડૉલરની નીચે રહેતા દેખાયા, તો સ્થાનિક બજારમાં પણ રેન્જબાઉન્ડ કામકાજ રહ્યું. સોના કરતા ચાંદીમાં તેજી તરફથી મૂવમેન્ટ ધીમી જોવા મળી.

શરૂઆતી કારોબારમાં સ્થાનિક બજારમાં બેઝ મેટલ્સ તરફથી મિશ્ર સંકેતો મળ્યા હતા, જ્યાં એલ્યુમિનિયમ અને ઝિંકમાં મજબૂતી રહી, પણ કોપરમાં નરમાશ જોવા મળી, જોકો LME પર સ્ટોક ઘટતા અને નબળા ડૉલરના કારણે કોપરમાં મજબૂતી દેખાઈ. આ સાથે જ ઇન્ટરનેશનલ કોપર સ્ટડી મુજબ ગ્લોબલ કોપર માર્કેટમાં જાન્યુઆરી થી ઓગસ્ટ દરમિયાન 99,000 ટનનું સરપ્લસ જોવા મળી શકે છે...આ સાથે જ જાન્યુઆરી થી ઓગસ્ટ દરમિયાન ગ્લોબલ મેટલ આઉટપુટ 5% વધી 17.61 મિલિયન ટન પર રહ્યું, તો વપરાશ 2.5% વધ્યો છે.

એગ્રી કૉમોડિટી પર નજર કરીએ તો, મસાલા પેકમાં જીરામાં 3 ટકાથી વધુનો ઘટાડો નોંધાયો, તો હળદર અને ધાણામાં પણ નરમાશ રહી, જ્યારે ગુવાર પેકમાં એક ટકાથી વધુની મજબૂતી સાથેનો કારોબાર જોવા મળી રહ્યો છે. તો કપાસિયા ખોળમાં પણ આજે સારી રિકવરી દેખાઈ.