કોમોડિટી લાઇવ: સોના-ચાંદીમાં નીચલા સ્તરેથી રિકવરી, બેઝ મેટલ્સમાં મિશ્ર કામકાજ

સોનામાં રિકવરી આવતા કિંમતો 5 મહિનાના નીચલા સ્તરેથી સુધરી અને COMEX પર ફરી 1900 ડૉરના સ્તરની આસપાસ કારોબાર નોંધાયો, આ સાથે જ સ્થાનિક બજારમાં 58,575ના સ્તરની આસપાસ ફ્લેટ ટૂ પોઝિટીવ કામકાજ જોવા મળી રહ્યું છે. બજારની નજર હવે US ફેડના ભાષણ પર બનેલી છે.

સોનાને પગલે ચાંદીમાં પણ નીચલા સ્તરેથી રિકવરી જોવા મળી, જ્યાં વૈશ્વિક બજારમાં કિંમતો સાડા 23 ડૉલરની ઉપર આવતી દેખાઈ, તો સ્થાનિક બજારમાં ભાવ 72,230ના સ્તરની આસપાસ પહોંચતા દેખાઈ રહ્યા છે.

સાઉદી અસર અને રશિયા તરફથી ઉત્પાદન કાપના નિર્ણય બાદ સપ્લાયની ચિંતા વધતા ક્રૂડમાં નીચલા સ્તરેથી રિકવરી જોવા મળી, જ્યાં બ્રેન્ટમાં 84 ડૉલરની ઉપર કારોબાર નોંધાયો, તો NYMEX ક્રૂડમાં પણ 79 ડૉલરની ઉપર કિંમતો પહોંચતી દેખાઈ રહી છે. પણ સ્થાનિક બજારમાં નેગેટીવ કામકાજ થઈ રહ્યું છે...ઉલ્લેખનિય છે કે, APIના રિપોર્ટ મુજબ USની સાપ્તાહિક ઇન્વેન્ટરીમાં ઘટાડો આવતા ક્રૂડની કિંમતોને સપોર્ટ મળી રહ્યો છે.

નેચરલ ગેસની કિંમતોમાં પણ ઉતાર-ચઢાવ જોવા મળી રહ્યા છે, આજે ફરી સ્થાનિક બજારમાં દબાણ આવતા 212ના સ્તરની આસપાસ કારોબાર જોવા મળી રહ્યો છે.

નજર કરીએ એગ્રી કૉમોડિટીના કારોબાર પર તો, ગુવાર પેકમાં ફરી પા ટકાથી વધુનું દબાણ બન્યું, કપાસિયા ખોળમાં પણ નરમાશ સાથેનો કારોબાર જોવા મળી રહ્યો છે. તો મસાલા પેકમાં પણ આશરે 1 ટકાથી વધુનો ઘટાડો નોંધાયો, જેમાં સૌથી વધુ નરમાશ હળદરમાં જોવા મળી રહી છે. આ સાથે જ એરંડામાં પણ પા ટકાનો ઘટાડો દેખાયો છે.