મહારાષ્ટ્રના પૂર્વ ગૃહપ્રધાન અનિલ દેશમુખને મળ્યા જામીન, પરંતુ NCPના નેતા હાલ જેલમાં જ રહેશે

બોમ્બે હાઈકોર્ટે સોમવારે મહારાષ્ટ્રના પૂર્વ ગૃહમંત્રી અને રાષ્ટ્રવાદી કોંગ્રેસ પાર્ટી (NCP)ના નેતા અનિલ દેશમુખને ભ્રષ્ટાચારના કેસમાં જામીન આપ્યા છે. જો કે, દેશમુખ જેલમાંથી બહાર આવે તેવી શક્યતા નથી કારણ કે કેન્દ્રીય તપાસ એજન્સી (CBI) એ ચુકાદાને સુપ્રીમ કોર્ટમાં પડકારવા માટે સમય માંગ્યો છે. 74 વર્ષીય નેતા હાલ મુંબઈની આર્થર રોડ જેલમાં બંધ છે.

સેન્ટ્રલ બ્યુરો ઑફ ઇન્વેસ્ટિગેશન (CBI) અને એન્ફોર્સમેન્ટ ડિરેક્ટોરેટ (ED) 74 વર્ષીય અનિલ દેશમુખ સામેના આરોપોની તપાસ કરી રહી છે. સમાચાર એજન્સી પીટીઆઈ અનુસાર, દેશમુખ જેલમાંથી બહાર નીકળી શકશે નહીં કારણ કે સીબીઆઈએ તેને સુપ્રીમ કોર્ટમાં પડકારવા માટે સમય માંગ્યા બાદ હાઈકોર્ટે આદેશ પર 10 દિવસ માટે રોક લગાવી દીધી છે.

જસ્ટિસ એમએસ કર્ણિકની સિંગલ બેન્ચે બંને પક્ષોની દલીલો સાંભળ્યા બાદ અનિલ દેશમુખની જામીન અરજી મંજૂર કરી હતી. હાલમાં તે ન્યાયિક કસ્ટડી હેઠળ મુંબઈની આર્થર રોડ જેલમાં બંધ છે. ગયા મહિને સીબીઆઈની વિશેષ અદાલતે તેમની જામીન અરજી ફગાવી દીધા બાદ દેશમુખે હાઈકોર્ટનો સંપર્ક કર્યો હતો. તેણે મેડિકલ ગ્રાઉન્ડ પર જામીન માંગ્યા હતા.

આ પણ વાંચો - “2024ની લોકસભા ચૂંટણીમા ત્રીજો મુખ્ય મોરચો નહીં હોય”, નીતિશ કુમારે BJPને હરાવવાની ફોર્મ્યુલા આપી

શું છે આરોપ?

જો કે, ભ્રષ્ટાચારના કેસમાં દેશમુખની જામીન અરજી સ્પેશિયલ સીબીઆઈ કોર્ટે એમ કહીને ફગાવી દીધી હતી કે તેમની સામે પ્રથમદર્શી પુરાવા છે. મુંબઈ પોલીસના તત્કાલીન કમિશનર પરમબીર સિંહે માર્ચ 2021માં આરોપ લગાવ્યો હતો કે તત્કાલિન ગૃહમંત્રી દેશમુખે પોલીસ અધિકારીઓને મુંબઈમાં રેસ્ટોરન્ટ અને બારમાંથી દર મહિને 100 કરોડ રૂપિયા એકત્ર કરવાનો ટાર્ગેટ આપ્યો હતો.

એપ્રિલ 2021માં હાઈકોર્ટે સીબીઆઈને દેશમુખ સામે પ્રાથમિક તપાસ કરવાનો નિર્દેશ આપ્યો હતો. સીબીઆઈએ બાદમાં દેશમુખ અને તેના સહયોગીઓ સામે કથિત ભ્રષ્ટાચાર અને સત્તાવાર સત્તાના દુરુપયોગ માટે એફઆઈઆર નોંધી હતી. આ મામલે વિવાદ વધતાં અનિલ દેશમુખે મહારાષ્ટ્રના ગૃહમંત્રી પદ પરથી રાજીનામું આપવું પડ્યું હતું. આ પછી ગયા વર્ષે 2 નવેમ્બરે તેની ધરપકડ કરવામાં આવી હતી.