અમેરિકી એરપોર્ટ પર રાહુલ ગાંધીને 2 કલાક જોવી પડી રાહ, કહ્યું- ‘હું હવે સામાન્ય માણસ છું, નથી રહ્યો સાંસદ'

કોંગ્રેસ નેતા રાહુલ ગાંધી (Rahul Gandhi in US) અમેરિકાના ત્રણ શહેરોના પ્રવાસ માટે મંગળવારે સાન ફ્રાન્સિસ્કો પહોંચ્યા. આ દરમિયાન તેઓ ભારતીય સમુદાયના લોકો અને અમેરિકન ધારાસભ્યોને મળશે. રાહુલ ગાંધીનું યુએસ એરપોર્ટ પર ઈન્ડિયન ઓવરસીઝ કોંગ્રેસના પ્રમુખ સામ પિત્રોડા અને સંગઠનના અન્ય સભ્યોએ સ્વાગત કર્યું હતું. કોંગ્રેસના સૂત્રોએ જણાવ્યું કે આ દરમિયાન રાહુલ ગાંધીને ઇમિગ્રેશન ક્લિયરન્સ માટે સાન ફ્રાન્સિસ્કો એરપોર્ટ પર બે કલાક રાહ જોવી પડી હતી.

ન્યૂઝ એજન્સી પીટીઆઈના જણાવ્યા અનુસાર, જ્યારે રાહુલ ગાંધી ઈમિગ્રેશન ક્લિયરન્સ માટે લાઈનમાં ઉભા હતા, તે જ ફ્લાઈટમાં મુસાફરી કરી રહેલા કેટલાક લોકોએ તેમની સાથે સેલ્ફી ક્લિક કરી. જ્યારે લોકોએ તેમને પૂછ્યું કે તમે લાઈનમાં કેમ ઉભા છો તો તેમણે કહ્યું કે, "હું એક સામાન્ય માણસ છું. મને તે ગમે છે. હું હવે સાંસદ નથી."

52 વર્ષીય કોંગ્રેસ નેતા ભારતીય-અમેરિકનોને સંબોધશે અને વોલ સ્ટ્રીટના અધિકારીઓ અને યુનિવર્સિટીના વિદ્યાર્થીઓ સાથે વાતચીત કરશે તેવી અપેક્ષા છે. તેઓ 4 જૂને ન્યૂયોર્કમાં જાહેર કાર્યક્રમ સાથે તેમનો પ્રવાસ સમાપ્ત કરવાના છે. આ વાર્તાલાપ ન્યૂયોર્કના જેવિટ્સ સેન્ટરમાં થશે.

પિત્રોડાએ ગયા અઠવાડિયે કહ્યું હતું કે રાહુલ ગાંધીની મુલાકાતનો હેતુ સહિયારા મૂલ્યો અને "વાસ્તવિક લોકશાહી"ના વિઝનને પ્રોત્સાહન આપવાનો હતો. રાહુલ ગાંધીને પ્રવાસ માટે રવિવારે નવો સામાન્ય પાસપોર્ટ જારી કરવામાં આવ્યો હતો.

After a 16 hour flight, waited another 2 hours at San Francisco airport for immigration with @RahulGandhi, who was beseiged with selfie requests by other passenegers in the queue.#RGinUS . pic.twitter.com/Luoyz1EF35

— Praveen Chakravarty (@pravchak) May 30, 2023

કોંગ્રેસના પૂર્વ અધ્યક્ષે સંસદ સભ્ય તરીકે તેમને આપવામાં આવેલ રાજદ્વારી પાસપોર્ટ સરેન્ડર કર્યા બાદ સામાન્ય પાસપોર્ટ માટે અરજી કરી હતી. કોંગ્રેસના ભૂતપૂર્વ પ્રમુખને ગુનાહિત માનહાનિના કેસમાં દોષિત ઠેરવ્યા બાદ ગુજરાતના સુરતની એક અદાલત દ્વારા સાંસદ તરીકે ગેરલાયક ઠેરવવામાં આવ્યા હતા. આ પછી રાહુલે ડિપ્લોમેટિક ટ્રાવેલ પાસપોર્ટ પરત કરી દીધા.

આ પણ વાંચો - રજીસ્ટ્રેશન વગર ઇન્વેસ્ટની સલાહ આપવા પર લેવાશે આકરા પગલા, માર્કેટ રેગ્યુલેટર SEBI બનાવી રહી છે કડક નિયમો