બેંકિંગ સેક્ટરમાં ઉલટી ગંગા: લોકો પૈસા જમા કરાવવા કરતાં લોન વધુ લઈ રહ્યા છે, જાણો RBIના આંકડા શું કહે છે?

Banking sector: ભારતના બેંકિંગ સેક્ટરમાં એક રસપ્રદ ટ્રેન્ડ જોવા મળી રહ્યો છે. લોકો બેંકોમાં પૈસા જમા કરાવવા કરતાં લોન લેવા પર વધુ ભાર આપી રહ્યા છે. રિઝર્વ બેંક ઓફ ઈન્ડિયા (RBI) દ્વારા જાહેર કરાયેલા તાજેતરના આંકડા સ્પષ્ટપણે દર્શાવે છે કે બેંકોની ધિરાણ વૃદ્ધિ (લોન આપવાનો દર) થાપણ વૃદ્ધિ (ડિપોઝિટ જમા થવાનો દર) કરતાં ઘણી આગળ નીકળી ગઈ છે.

આંકડા શું કહે છે?

RBIના ડેટા અનુસાર, 31 ઓક્ટોબરે પૂરા થયેલા પખવાડિયામાં બેંકોની ધિરાણ વૃદ્ધિ 11.30%ના દરે થઈ છે. જોકે, આ આંકડો 17 ઓક્ટોબરના 11.50% કરતાં થોડો ઓછો છે, પરંતુ તે હજુ પણ ઘણો મજબૂત માનવામાં આવે છે. બીજી તરફ, જો આપણે થાપણોની વાત કરીએ તો, તેમાં માત્ર 9.70%નો વધારો જોવા મળ્યો છે. આ આંકડો 17 ઓક્ટોબરના 9.50% કરતાં થોડો વધારે છે, પરંતુ તે લોન વૃદ્ધિ કરતાં ઘણો પાછળ છે.

કુલ ધિરાણ: રૂપિયા 193.90 ટ્રિલિયન

આ ટ્રેન્ડ માત્ર એક પખવાડિયાનો નથી. વર્તમાન નાણાકીય વર્ષના પ્રથમ છ મહિના (એપ્રિલથી સપ્ટેમ્બર) પર નજર કરીએ તો, વાર્ષિક ધોરણે ધિરાણ વૃદ્ધિ 10.40% રહી છે, જ્યારે થાપણ વૃદ્ધિનો આંકડો 9.50% પર જ રહ્યો છે.

લોનની માંગ વધવા પાછળનું કારણ શું છે?

બેંકિંગ ક્ષેત્રના નિષ્ણાતો માને છે કે આવનારા સમયમાં લોનની માંગ વધુ વધવાની પૂરી સંભાવના છે. તેના મુખ્ય ત્રણ કારણો છે.

1) GST દરોમાં ઘટાડો: સરકાર દ્વારા ગુડ્સ એન્ડ સર્વિસ ટેક્સ (GST)માં ઘટાડો કરવાથી વેપાર-ધંધાને પ્રોત્સાહન મળશે, જેના કારણે બિઝનેસ લોનની માંગ વધશે.

2) આવકવેરામાં રાહત: આવકવેરામાં મળેલી રાહતને કારણે લોકોની ખરીદ શક્તિ વધી છે, જેનાથી હોમ લોન, કાર લોન અને પર્સનલ લોનની માંગ વધી શકે છે.

3) નીચા વ્યાજ દરો: હાલમાં વ્યાજ દરો પ્રમાણમાં નીચા સ્તરે છે, જે લોકોને લોન લેવા માટે પ્રોત્સાહિત કરી રહ્યા છે.

ટૂંકમાં, બજારમાં પૈસા ખર્ચ કરવાનો માહોલ બની રહ્યો છે, જે દર્શાવે છે કે આર્થિક ગતિવિધિઓ વેગ પકડી રહી છે. જો આ ટ્રેન્ડ ચાલુ રહેશે, તો તે ભારતીય અર્થતંત્ર માટે એક સકારાત્મક સંકેત હોઈ શકે છે.

આ પણ વાંચો-માઇક્રોફાઇનાન્સને લાગ્યું ગ્રહણ: 450 લાખ લોન ખાતા ઘટ્યા, ફંડમાં 55%નો કડાકો!