India-Israel Bilateral Investment Treaty: ભારત-ઇઝરાયેલ વચ્ચે ઐતિહાસિક રોકાણ સંધિ, બંને દેશોના આર્થિક સંબંધોને મળશે નવું બળ

India-Israel Bilateral Investment Treaty: ભારત અને ઇઝરાયેલે સોમવાર, 8 સપ્ટેમ્બર, 2025ના રોજ નવી દિલ્હીમાં દ્વિપક્ષીય રોકાણ સંધિ (Bilateral Investment Treaty - BIT) પર હસ્તાક્ષર કર્યા. આ સમજૂતી બંને દેશો વચ્ચે રોકાણને પ્રોત્સાહન આપવા અને આર્થિક સંબંધોને વધુ મજબૂત કરવા માટે મહત્ત્વનું પગલું છે. આ સંધિ પર ભારતના નાણાં મંત્રી નિર્મલા સીતારમણ અને ઇઝરાયેલના નાણાં મંત્રી બેઝેલેલ સ્મોટ્રિચે હસ્તાક્ષર કર્યા.

ભારતના નાણાં મંત્રાલયે પોતાના X એકાઉન્ટ પર આ અંગે જાહેરાત કરી હતી, જેમાં જણાવાયું, “ભારત અને ઇઝરાયેલે આજે દ્વિપક્ષીય રોકાણ સંધિ (BIT) પર હસ્તાક્ષર કર્યા, જે બંને દેશોના રોકાણકારોને સુરક્ષા અને વિશ્વાસ આપશે.”

રોકાણકારો માટે સુરક્ષા અને વિશ્વાસનું વાતાવરણ

આ સંધિ બંને દેશોના રોકાણકારોને સુરક્ષિત વાતાવરણ પૂરું પાડશે અને વિવાદ નિવારણ માટે સ્વતંત્ર મધ્યસ્થી પ્લેટફોર્મની સુવિધા આપશે. આ ઉપરાંત, આ સમજૂતી ભારત અને ઇઝરાયેલ વચ્ચે મુક્ત વેપાર સમજૂતી (FTA) માટે પણ માર્ગ મોકળો કરશે. ઇઝરાયેલના નાણાં મંત્રી બેઝેલેલ સ્મોટ્રિચ 8થી 10 સપ્ટેમ્બર સુધી ત્રણ દિવસની ભારત યાત્રા પર છે. આ યાત્રા દરમિયાન તેઓ ભારતના વાણિજ્ય અને ઉદ્યોગ મંત્રી પીયૂષ ગોયલ તેમજ આવાસ અને શહેરી વિકાસ મંત્રી મનોહર લાલ સાથે મુલાકાત કરશે. તેઓ મુંબઈ અને ગાંધીનગરના ગિફ્ટ સિટીની પણ મુલાકાત લેશે.

ભારત અને ઇઝરાયેલ વચ્ચે વાર્ષિક લગભગ 4 બિલિયન ડોલરનો દ્વિપક્ષીય વેપાર થાય છે. વર્ષ 2000થી 2025 દરમિયાન ભારતમાંથી ઇઝરાયેલમાં 443 મિલિયન ડોલરનું રોકાણ થયું, જ્યારે એપ્રિલ 2000થી માર્ચ 2025 દરમિયાન ઇઝરાયેલે ભારતમાં 334.2 મિલિયન ડોલરનું FDI (Foreign Direct Investment) કર્યું. ઇઝરાયેલે અત્યાર સુધીમાં UAE, જાપાન, ફિલિપાઇન્સ, થાઇલેન્ડ અને દક્ષિણ આફ્રિકા સહિત 15થી વધુ દેશો સાથે BIT પર હસ્તાક્ષર કર્યા છે.

ભવિષ્યની સંભાવનાઓ

આ સંધિ બંને દેશોના રણનીતિક સંબંધોને વધુ ગાઢ બનાવશે અને આર્થિક સહયોગને નવી ઊંચાઈઓ પર લઈ જશે. ભારત અને ઇઝરાયેલના આ પગલાથી બંને દેશોના રોકાણકારોને નવી તકો મળશે અને બંને દેશોની અર્થવ્યવસ્થાઓને નવું બળ મળશે.

આ પણ વાંચો-Ways to save money: પૈસા બચાવવાની આ 10 સ્માર્ટ ટિપ્સ આજથી જ અપનાવો, બદલાઈ જશે આર્થિક સ્થિતિ!