Foxconn: ફોક્સકોન કર્ણાટકમાં 5,000 કરોડનું કરશે રોકાણ, 13000 લોકોને રોજગારી મળવાનો અંદાજ

Foxconn: તાઈવાનની ઈલેક્ટ્રોનિક્સ મેન્યુફેક્ચરિંગ કંપની ફોક્સકોન કર્ણાટકમાં તેના બે પ્રોજેક્ટમાં રૂપિયા 5,000 કરોડનું રોકાણ કરશે. તેનાથી 13,000 લોકોને રોજગાર મળશે. ફોક્સકોન અને કર્ણાટક સરકારે આ સંબંધમાં લેટર ઓફ ઈન્ટેન્ટ (LOI) પર હસ્તાક્ષર કર્યા છે. આ કરાર હેઠળ કંપની બે મેન્યુફેક્ચરિંગ પ્રોજેક્ટ સ્થાપશે. એક પ્રોજેક્ટ અમેરિકન કંપની એપ્લાઇડ મટિરિયલ્સ ( Applied Materials) સાથે પાર્ટનરશીપમાં હશે.

કર્ણાટક સરકારના પ્રતિનિધિઓ 31 જુલાઈના રોજ ચેન્નાઈમાં ફોક્સકોનના ચેરમેન યંગ લિયુને મળ્યા હતા અને બંને પક્ષો વચ્ચે એક પત્ર પર હસ્તાક્ષર કરવામાં આવ્યા હતા. કર્ણાટકના ઉદ્યોગ વિભાગના જણાવ્યા અનુસાર, ફોક્સકોન રાજ્યમાં બે પ્રોજેક્ટ પર કામ કરી રહી છે - એક ફોન એન્ક્લોઝર મેન્યુફેક્ચરિંગ સાથે સંબંધિત છે, જ્યારે બીજો સેમિકન્ડક્ટર ઇક્વિપમેન્ટ મેન્યુફેક્ચરિંગ સાથે સંબંધિત છે.

કર્ણાટકના ઇન્ડસ્ટ્રીઝ ડિપાર્ટમેન્ટ દ્વારા જારી કરાયેલા નિવેદન અનુસાર ફોક્સકોન સ્માર્ટફોનના એલિમેન્ટ્સ (ખાસ કરીને આઇફોન માટે મિકેનિકલ એન્ક્લોઝર) બનાવવા માટે એક પ્લાન્ટ સ્થાપી રહી છે. આ પ્રોજેક્ટ માટે સૂચિત રોકાણ $350 મિલિયન (આશરે રૂપિયા 3,000 કરોડ) છે. તેનાથી 12,000 લોકોને રોજગાર મળશે. કંપની આ માટે બેંગલુરુ અને તેની આસપાસ જમીન શોધી રહી છે.

આ ઉપરાંત, કંપની સેમિકન્ડક્ટર મેન્યુફેક્ચરિંગ સાધનોના ઉત્પાદન માટે એપ્લાઇડ મટિરિયલ્સ સાથે પાર્ટનરશીપ કરશે. કર્ણાટક સરકારના એક નિવેદનમાં જણાવાયું છે કે, "પ્રોજેક્ટમાં $250 મિલિયન (રૂપિયા 2,000 કરોડ)નું રોકાણ જોવા મળશે અને લગભગ 1,000 લોકોને રોજગારી મળશે."