AAPએ જે ઉમેદવારના અપહરણનો દાવો કર્યો, તેણે જ પાર્ટીને આપ્યો ઝટકો, જાણો સમગ્ર મામલો

ELECTION GUJARAT 2022: ગુજરાતના સુરત પૂર્વથી આમ આદમી પાર્ટીના ઉમેદવાર કંચન જરીવાલાએ હવે તેમના અપહરણની બાબતને ફગાવીને પોતાની જ પાર્ટી પર સવાલ ઉઠાવ્યા છે. આ અંગે તેમણે બુધવારે એક વીડિયો મેસેજ પણ જાહેર કર્યો હતો. આમાં તેણે કથિત રીતે કહ્યું કે તેણે કોઈપણ દબાણ વગર પોતાનું નામાંકન પાછું ખેંચ્યું છે. AAPની ટિકિટ પર ચૂંટણી લડવા બદલ તેમના મતવિસ્તારના મતદારો તેમને દેશદ્રોહી અને ગુજરાત વિરોધી કહી રહ્યા છે. એટલા માટે તેણે પોતાના અંતરાત્માની વાત સાંભળીને જ આ નિર્ણય લીધો છે.

વીડિયોમાં જરીવાલાને કથિત રીતે કહેતા સાંભળવામાં આવ્યા હતા, “મારા પ્રચાર દરમિયાન લોકો મને પૂછતા હતા કે હું દેશ વિરોધી અને ગુજરાત વિરોધી પાર્ટીનો ઉમેદવાર કેમ બન્યો? મેં મારો આંતરિક અવાજ સાંભળ્યો. મેં કોઈપણ દબાણ વગર મારું નામાંકન પાછું ખેંચ્યું છે. હું આવી પાર્ટીનું સમર્થન કરી શકતો નથી."

આ પણ વાંચો - PM Modi at G20 Summit: ઈંડોનેશિયાના રાષ્ટ્રપતિ જોકો વિડોડોએ ભારતને સોંપી G20 ની કમાન, જાણો પીએમ મોદીએ શું કહ્યુ

અગાઉના દિવસે, AAP નેતા અને દિલ્હીના નાયબ મુખ્ય પ્રધાન મનીષ સિસોદિયાએ આરોપ લગાવ્યો હતો કે જરીવાલાના અપહરણ ભાજપના ઇશારે કરવામાં આવ્યા હતા, જેને ગુજરાત ચૂંટણીમાં બેઠક ગુમાવવાનો ભય હતો.

તેમણે દાવો કર્યો હતો કે તેમની પાર્ટીના સુરતના ઉમેદવાર મંગળવારથી તેમના પરિવારના સભ્યો સાથે ગુમ છે. સિસોદિયાએ દાવો કર્યો હતો કે તેઓ તેમના ઉમેદવારી પત્રોની ચકાસણી કરવા માટે છેલ્લે સુરતમાં ચૂંટણી પંચની ઓફિસમાં જોવા મળ્યા હતા. સિસોદિયાએ આરોપ લગાવ્યો કે જ્યારે જરીવાલા રિટર્નિંગ ઓફિસરની ઓફિસમાં ગયા ત્યારે તેમને પોતાનું નામાંકન પાછું ખેંચવાની ફરજ પડી હતી.

સિસોદિયાએ દિલ્હીમાં મીડિયાને જણાવ્યું હતું કે, “આ ચૂંટણીમાં ભાજપ ગુજરાતમાં ખરાબ રીતે હારી રહી છે અને એટલી ચીડાઈ ગઈ છે કે તે સુરત પૂર્વમાંથી અમારા ઉમેદવારનું અપહરણ કરવાના સ્તરે આવી ગઈ છે. હારના ડરથી ભાજપના ગુંડાઓએ સુરતમાંથી AAP ઉમેદવાર કંચન જરીવાલાને અપહરણ કરી લીધું છે.

સિસોદિયાએ આક્ષેપ કર્યો હતો કે ભાજપના ગુંડાઓએ જરીવાલાના નામાંકનને રદ કરાવવાનો પ્રયાસ પણ કર્યો હતો, પરંતુ રિટર્નિંગ ઓફિસર તેમ કરી શક્યા ન હતા કારણ કે તેમના કાગળોમાં કોઈ ખામી ન હતી.