રાહુલ ગાંધીની સદ્દામ હુસૈન સાથે સરખામણી! હિમંતા બિસ્વાના નિવેદનથી ચગ્યો નવો વિવાદ

GUJARAT ELECTION 2022: આસામના મુખ્યમંત્રી હિમંતા બિસ્વા સરમાએ કહ્યું છે કે કોંગ્રેસના નેતા રાહુલ ગાંધી ઈરાકના પૂર્વ તાનાશાહ સદ્દામ હુસૈન જેવા દેખાય છે. આ સાથે જ તેમણે રાહુલને સલાહ આપી હતી કે જો તેઓ પોતાને સરદાર પટેલ, જવાહરલાલ નેહરુ કે મહાત્મા ગાંધી જેવા દેખાડ્યા હોત તો સારું થાત.

મુખ્યમંત્રી હિમંતા સરમા પર પ્રહાર કરતા કોંગ્રેસના વરિષ્ઠ નેતા મનીષ તિવારીએ કહ્યું કે બોલતી વખતે ભાષાની સજાવટનું ધ્યાન રાખવું જોઈએ. આ દિવસોમાં કોંગ્રેસની ભારત જોડો યાત્રા દરમિયાન રાહુલ ગાંધી વધેલી દાઢીમાં જોવા મળે છે.

સીએમ સરમાએ મંગળવારે અમદાવાદમાં એક જાહેર સભામાં કહ્યું, "મેં તાજેતરમાં જોયું કે રાહુલનો દેખાવ બદલાઈ ગયો છે. મેં થોડા દિવસ પહેલા એક ટીવી ઈન્ટરવ્યુમાં કહ્યું હતું કે તેના નવા દેખાવમાં કંઈ ખોટું નથી. પરંતુ જો તમે દેખાવ બદલવો પડ્યો, તો કમસેકમ તેને સરદાર વલ્લભભાઈ પટેલ કે જવાહરલાલ નેહરુ જેવો દેખાડો. જો તેઓ ગાંધીજી જેવો હોત તો સારું થાત, પણ તમે તમારો ચહેરો સદ્દામ હુસૈન જેવો કેમ બનાવી રહ્યા છો?"

આ પણ વાંચો - પીએમ મોદીએ ગુજરાતની કમાન લીધી પોતાના હાથમાં, 7 જ કલાકમાં એક બાદ એક 4 જિલ્લામાં યોજી 4 જાહેરસભા

તેમણે દાવો કર્યો કે આ જ કારણ છે કે કોંગ્રેસની સંસ્કૃતિ ભારતીય લોકો સાથે મેળ ખાતી નથી. સરમાએ કહ્યું કે તેમની સંસ્કૃતિ તે લોકોની નજીક છે જેમણે ક્યારેય ભારતને સમજી નથી.

શર્માએ દાવો કર્યો હતો કે રાહુલ ગાંધીએ ભારત જોડો યાત્રા દરમિયાન હિમાચલ પ્રદેશ અને ગુજરાતની મુલાકાત લીધી નથી, જ્યાં ચૂંટણી થઈ છે અથવા થઈ રહી છે. તેમણે કહ્યું કે આ રાજ્યોને બદલે રાહુલ ગાંધી એવા રાજ્યો પર ફોકસ કરી રહ્યા છે જ્યાં ચૂંટણી નથી કારણ કે તેઓ જાણે છે કે તેઓ જ્યાં પણ જશે ત્યાં તેઓ હારી જશે.

આસામના મુખ્યમંત્રીએ કહ્યું કે તેમણે મહારાષ્ટ્રમાં ભારત જોડો યાત્રામાં રાહુલ ગાંધી સાથે નર્મદા બચાવો આંદોલન કાર્યકર્તા મેધા પાટકરને જોયા હતા.