Karnataka CM: સિદ્ધારમૈયા કે ડીકે શિવકુમાર? કર્ણાટકના નવા મુખ્યમંત્રી અંગે આજે નિર્ણય સંભવ

Karnataka CM: કર્ણાટકમાં મુખ્યમંત્રી પદને લઈને કોંગ્રેસમાં ખેંચતાણ ચાલી રહી છે. સીએમ પદના બંને મુખ્ય દાવેદાર સિદ્ધારમૈયા અને ડીકે શિવકુમાર દિલ્હીમાં છે. માનવામાં આવે છે કે આજે એટલે કે બુધવારે (17 મે) પાર્ટી હાઈકમાન્ડ સાથે તેમની બેઠક બાદ કર્ણાટકના નવા મુખ્યમંત્રીના નામની જાહેરાત કરવામાં આવશે. સૂત્રોનું કહેવું છે કે સિદ્ધારમૈયા અને શિવકુમાર બંને મજબૂત દાવાઓ ધરાવે છે, તેથી નિર્ણયમાં વિલંબ થઈ રહ્યો છે. મુખ્યમંત્રીને લઈને પાર્ટીમાં બેઠકોનો દોર ચાલી રહ્યો છે. માનવામાં આવે છે કે બુધવારે આ અંગે નિર્ણય લેવામાં આવી શકે છે. જણાવી દઈએ કે શપથ ગ્રહણની તારીખ 18 મે નક્કી કરવામાં આવી છે, પરંતુ હજુ સુધી કોંગ્રેસ આ પદ માટે કોઈને પસંદ કરી શકી નથી.

ખડગે બંને નેતાઓને મળ્યા હતા

કર્ણાટકના આગામી મુખ્યપ્રધાનની પસંદગી માટે કોંગ્રેસમાં મંગળવારે દિવસભર ઉગ્ર મંથન ચાલુ રહ્યું હતું. કોંગ્રેસ અધ્યક્ષ મલ્લિકાર્જુન ખડગેએ સૌથી પહેલા રાહુલ ગાંધી સાથે ચર્ચા કરી હતી. ત્યારબાદ સિદ્ધારમૈયા અને ડીકે શિવકુમારને મળ્યા, જે બંને નેતાઓ સીએમ પદના પ્રબળ દાવેદાર માનવામાં આવે છે. જો કે દક્ષિણ ભારતના આ મહત્વના રાજ્યના આગામી મુખ્યમંત્રી કોણ હશે તે અંગે હજુ પણ શંકા છે. જો કે, સિદ્ધારમૈયા આ રેસમાં સૌથી આગળ માનવામાં આવે છે. સૂત્રોનું કહેવું છે કે બુધવારે પણ ખડગેના નિવાસસ્થાને વરિષ્ઠ નેતાઓની બેઠક થઈ શકે છે, જેમાં સર્વસંમતિ સાધવાનો પ્રયાસ કરવામાં આવી શકે છે.

કર્ણાટકમાં પાર્ટીના વિધાયક દળના નેતાની પસંદગી કરવા માટે ખડગેએ મંગળવારે પૂર્વ કોંગ્રેસ અધ્યક્ષ રાહુલ ગાંધી સાથે વિગતવાર બેઠક કરી હતી. પાર્ટીના સંગઠન મહાસચિવ કેસી વેણુગોપાલ અને કર્ણાટકના પ્રભારી રણદીપ સુરજેવાલાએ ખડગેના નિવાસસ્થાને આયોજિત બેઠકમાં હાજરી આપી હતી. આ પછી સાંજે ખડગે પહેલા ડીકે શિવકુમાર અને સિદ્ધારમૈયાને અલગ-અલગ મળ્યા હતા.