BSPએ વિપક્ષી ગઠબંધન I.N.D.I.A.થી પોતાને કર્યા દૂર, માયાવતીએ એકલા હાથે લોકસભા ચૂંટણી લડવાની કરી જાહેરાત

બહુજન સમાજ પાર્ટી (BSP) પ્રમુખ માયાવતીએ બુધવારે એક પ્રેસ કોન્ફરન્સમાં કહ્યું કે તેમની પાર્ટી વિપક્ષી ગઠબંધન I.N.D.I.A.માં સામેલ થશે નહીં. બસપાના વડાએ 2024ની લોકસભા ચૂંટણી એકલા હાથે લડવાની જાહેરાત કરી છે. માયાવતીએ આ જાહેરાત સાથે વિપક્ષી ગઠબંધનને મોટો ઝટકો આપ્યો છે. માયાવતીએ કહ્યું કે અમે રાજસ્થાન, મધ્યપ્રદેશ, છત્તીસગઢ અને તેલંગાણામાં પણ પોતાના દમ પર ચૂંટણી લડીશું. તમને જણાવી દઈએ કે, વિપક્ષના 26 પક્ષોએ મંગળવારે આગામી વર્ષની લોકસભા ચૂંટણી માટે પાયો નાખતા ભારતીય રાષ્ટ્રીય વિકાસલક્ષી ગઠબંધન (I.N.D.I.A.) નામના નવા જોડાણની જાહેરાત કરી હતી.

માયાવતીએ કહ્યું કે લોકસભા ચૂંટણીનો સમય હવે ખૂબ નજીક છે. સત્તાધારી ગઠબંધન અને વિપક્ષના ગઠબંધનની બેઠકોનો દોર ચાલી રહ્યો છે. જો કે અમારી પાર્ટી પણ આ મામલામાં પાછળ નથી. તેમણે કહ્યું કે એક તરફ સત્તાધારી પાર્ટી એનડીએ પૂર્ણ બહુમત સાથે સરકાર બનાવવાની દલીલો આપી રહી છે અને બીજી તરફ વિપક્ષી ગઠબંધન સત્તાધારી પાર્ટીને હરાવવા માટે કામ કરી રહ્યું છે અને બસપા પણ આમાં પાછળ નથી.

બીએસપી વડાએ કહ્યું કે કોંગ્રેસ પાર્ટી પોતાના જેવા જાતિવાદી અને મૂડીવાદી વિચારધારાવાળા પક્ષ સાથે ગઠબંધન કરીને સત્તામાં પાછા આવવાનું વિચારી રહી છે. તે જ સમયે, એનડીએ ફરીથી સત્તામાં આવવાનો દાવો કરી રહ્યું છે. તેમણે કહ્યું કે, પરંતુ તેમની કાર્યશૈલી જ દર્શાવે છે કે તેમની નીતિ અને વિચારસરણી લગભગ સમાન રહી છે. આ જ કારણ છે કે બસપાએ તેમનાથી દૂરી બનાવી લીધી છે. માયાવતીએ કહ્યું કે અમે એકલા હાથે ચૂંટણી લડીશું. અમે રાજસ્થાન, મધ્યપ્રદેશ, છત્તીસગઢ, તેલંગાણામાં સ્વબળે ચૂંટણી લડીશું. માયાવતીએ કહ્યું કે હરિયાણા, પંજાબ અને અન્ય રાજ્યોમાં અમે રાજ્યના પ્રાદેશિક પક્ષો સાથે ચૂંટણી લડી શકીએ છીએ.