NCPમાં ભડકો થતાં બેંગલુરુમાં યોજાનારી વિપક્ષની બેઠક મોકૂફ, હવે સંસદ સત્ર બાદ યોજાશે બેઠક

શરદ પવારની નેશનાલિસ્ટ કોંગ્રેસ પાર્ટી (NCP)માં બળવો ફાટી નીકળ્યા બાદ વિપક્ષી એકતા પણ જોખમમાં છે. પટના બાદ હવે કર્ણાટકની રાજધાની બેંગલુરુમાં યોજાનારી વિપક્ષની બેઠક સ્થગિત કરી દેવામાં આવી છે. જેડીયુના વરિષ્ઠ નેતા કેસી ત્યાગીએ બેઠક સ્થગિત કરવાની જાણકારી આપી છે. કહેવામાં આવી રહ્યું છે કે મહારાષ્ટ્રની રાજનીતિમાં એનસીપીની અંદર રાજકીય ખેંચતાણ બાદ બેંગલુરુમાં 13-14 જુલાઈના રોજ યોજાનારી વિપક્ષની બેઠક પણ સ્થગિત કરી દેવામાં આવી છે. તેમણે કહ્યું છે કે હાલ માટે આ બેઠક રદ કરવામાં આવી છે. સંસદના ચોમાસુ સત્ર બાદ નવી તારીખની જાહેરાત કરવામાં આવશે.

મહારાષ્ટ્રમાં રાજકીય ઉથલપાથલ આ બેઠક મુલતવી રાખવાનું મુખ્ય કારણ માનવામાં આવે છે. માનવામાં આવી રહ્યું છે કે હવે ચોમાસુ સત્ર સમાપ્ત થયા બાદ બેઠક યોજાશે. મોકૂફ રાખવાનું કારણ ચોમાસુ સત્ર અને બિહાર અને કર્ણાટક વિધાનસભાની બેઠક વચ્ચે તારીખોની અથડામણને પણ દર્શાવવામાં આવ્યું છે. બિહાર વિધાનસભાનું ચોમાસુ સત્ર 10 થી 24 જુલાઈ સુધી પ્રસ્તાવિત છે.

સૂત્રોના જણાવ્યા અનુસાર, નીતિશ કુમારની પાર્ટી જેડીયુએ કોંગ્રેસ અધ્યક્ષ મલ્લિકાર્જુન ખડગેને બેઠક સ્થગિત કરવા કહ્યું કારણ કે તેઓ અને તેજસ્વી યાદવ વિધાનસભા સત્રમાં વ્યસ્ત હશે. કેન્દ્રીય સંસદીય બાબતોના મંત્રી પ્રહલાદ જોશીએ કહ્યું છે કે સંસદનું ચોમાસુ સત્ર 20 જુલાઈથી શરૂ થશે અને 11 ઓગસ્ટ સુધી ચાલશે.

2024ની લોકસભા ચૂંટણીમાં કેન્દ્રમાં સત્તારૂઢ ભાજપ સામે લડવા માટે તમામ રાજકીય પક્ષો એકસાથે આવી રહ્યા છે. આ ક્રમમાં ગત મહિને 23 જૂને વિપક્ષી દળોએ પટનામાં બેઠક યોજી હતી. આ બેઠકમાં 15 રાજકીય પક્ષોના નેતાઓએ હાજરી આપી હતી. તેમાં પશ્ચિમ બંગાળના મુખ્યમંત્રી મમતા બેનર્જી, દિલ્હીના મુખ્યમંત્રી અરવિંદ કેજરીવાલ, પંજાબના મુખ્યમંત્રી ભગવંત માન અને તમિલનાડુના મુખ્યમંત્રી એમકે સ્ટાલિન ઉપરાંત અખિલેશ યાદવ, ઉદ્ધવ ઠાકરે અને મહેબૂબા મુફ્તી સહિત છ રાજ્યોના મુખ્યમંત્રીઓએ હાજરી આપી હતી.