Modi Surname Case: માનહાનિ કેસમાં રાહુલ ગાંધીને મોટો ઝટકો, ગુજરાત HCએ રિવ્યુ પિટિશન ફગાવી, બે વર્ષની સજા યથાવત, સંસદપદ પાછું મળવાની આશા પર ફરી વળ્યું પાણી

Modi Surname Case: ગુજરાત હાઈકોર્ટે (Gujarat High Court) કોંગ્રેસના ભૂતપૂર્વ અધ્યક્ષ રાહુલ ગાંધી (Rahul Gandhi)ની તેમની ‘મોદી સરનેમ કેસ' (Modi Surname Case) ટિપ્પણી પર ફોજદારી માનહાનિના કેસમાં દોષિતને પડકારતી સમીક્ષા અરજીને ફગાવી દીધી છે. ગુજરાત હાઈકોર્ટે મોદી સરનેમ અને માનહાનિ કેસમાં રાહુલ ગાંધીની બે વર્ષની સજાને યથાવત રાખી છે. મોદી સરનેમ માનહાનિ કેસમાં બે વર્ષની સજા સામે રાહુલ ગાંધીની અપીલ પર ગુજરાત હાઈકોર્ટે પોતાનો ચુકાદો આપ્યો છે. દોષસિદ્ધ પર રોક લગાવવાનો ઇનકાર કર્યા પછી ગાંધીનું સંસદનું સભ્યપદ હાલ પૂરતું સ્થગિત રહેશે. કોંગ્રેસ આવતા અઠવાડિયે સુપ્રીમ કોર્ટનો સંપર્ક કરી શકે છે. માનહાનિના આ કેસમાં રાહુલ ગાંધીએ નીચલી કોર્ટ દ્વારા આપવામાં આવેલી સજા પર રોક લગાવવાની માંગ સાથે હાઈકોર્ટમાં અપીલ દાખલ કરી હતી.

જસ્ટિસ હેમંત પ્રચ્છકે મે મહિનામાં રાહુલ ગાંધીની અરજી પર સુનાવણી કરતી વખતે કોઈપણ વચગાળાની રાહત આપવાનો ઈન્કાર કર્યો હતો. ન્યાયાધીશે કહ્યું હતું કે તેઓ ઉનાળાના વેકેશન પછી અંતિમ આદેશ પસાર કરશે. 23 માર્ચે સુરતની CJM કોર્ટે 2019ની લોકસભા ચૂંટણી સંબંધિત નિવેદન બદલ રાહુલ ગાંધીને બે વર્ષની જેલની સજા ફટકારી હતી. આ પછી તેમની લોકસભાની સદસ્યતા પણ જતી રહી હતી. રાહુલ ગાંધીએ CJM કોર્ટના નિર્ણયને સુરત સેશન્સ કોર્ટમાં પડકાર્યો હતો, પરંતુ ત્યાંથી રાહત ન મળતા રાહુલ ગાંધી હાઈકોર્ટ પહોંચ્યા હતા.

રાહુલ ગાંધીના વકીલે 29 એપ્રિલના રોજ સુનાવણી દરમિયાન ગુજરાત હાઈકોર્ટમાં દલીલ કરી હતી કે જામીનપાત્ર અને બિન-અજ્ઞાનપાત્ર ગુના માટે મહત્તમ બે વર્ષની સજાનો અર્થ એ છે કે તેમના અસીલ તેમની લોકસભાની બેઠક ગુમાવી શકે છે. સુરતની મેટ્રોપોલિટન મેજિસ્ટ્રેટ કોર્ટે 23 માર્ચે ગુજરાતમાં ભારતીય જનતા પાર્ટી (BJP)ના ધારાસભ્ય પૂર્ણેશ મોદી દ્વારા 2019ના કેસમાં ભારતીય દંડ સંહિતા (IPC)ની કલમ 499 અને 500 (ગુનાહિત માનહાનિ) હેઠળ રાહુલ ગાંધીને દોષિત ઠેરવ્યા હતા.

ઉનાળું વેકેશન પૂર્વે 2 મે 2023ના રોજ રાહુલ ગાંધીની અરજી પર દલીલો અને રજૂઆત લંબાણપૂર્વક થઇ હતી. પક્ષકારોને સાંભળ્યા બાદ જસ્ટિસ હેમંત પ્રચ્છકે રાહુલ ગાંધીની અરજી દાખલ કરી હતી અને આ કેસ સંબંધિત તમામ રેકોર્ડ સુરત કોર્ટમાંથી મંગાવવા માટે હુકમ કર્યો હતો. રાહુલ ગાંધીને સુરત કોર્ટ દ્વારા સંભળાવવામાં આવેલી 2 વર્ષની સજા પર સ્ટે અંગેનો અંતિમ ચુકાદો ઉનાળું વેકેશન બાદ જાહેર કરવાનું હાઇકોર્ટ દ્વારા જણાવવામાં આવ્યું હતું.