માનહાનિના કેસમાં રાહુલ ગાંધીને સુરત કોર્ટમાંથી મળ્યા જામીન, પ્રિયંકા વાડ્રા સહિત કોંગ્રેસના અનેક સીએમ હાજર

Rahul Gandhi Criminal Defamation Case: કોંગ્રેસના નેતા રાહુલ ગાંધીએ આખરે 2019ના ફોજદારી માનહાનિ કેસમાં તેમની સજા સામે સુરતની કોર્ટમાં અપીલ દાખલ કરી છે. બદનક્ષીના કેસમાં રાહુલ ગાંધીને હાલ સુરત કોર્ટમાંથી જામીન મળ્યા છે. આ મામલે હવે આગામી સુનાવણી 13 એપ્રિલે થશે. આ પહેલા આજે કોંગ્રેસ નેતા રાહુલ ગાંધીએ સુરત સેશન્સ કોર્ટમાં તેમની સજાને પડકારતી અપીલ દાખલ કરી હતી. સૂત્રોએ જણાવ્યું હતું કે કોંગ્રેસના નેતાએ સેશન્સ કોર્ટને તેમની બે વર્ષની સજાને સ્થગિત કરવા વિનંતી કરી હતી. આ દરમિયાન પ્રિયંકા ગાંધી વાડ્રા, કોંગ્રેસ શાસિત ત્રણ રાજ્યોના મુખ્યમંત્રીઓ અને પાર્ટીના અન્ય રાષ્ટ્રીય નેતાઓ અને રાજ્ય એકમોના નેતાઓ હાજર રહ્યા હતા. રાહુલ ગાંધી સોમવારે બપોરે 2.30 કલાકે સુરત પહોંચ્યા હતા.

સૂત્રોએ જણાવ્યું હતું કે કોંગ્રેસ મહાસચિવ પ્રિયંકા ગાંધી વાડ્રા, છત્તીસગઢના મુખ્યમંત્રી ભૂપેશ બઘેલ, રાજસ્થાનના મુખ્યમંત્રી અશોક ગેહલોત અને હિમાચલ પ્રદેશના મુખ્યમંત્રી સુખવિંદર સિંહ સુખુ પણ રાહુલ ગાંધીની કોર્ટની મુલાકાત દરમિયાન શહેરમાં હાજર હતા. રાહુલ ગાંધી તેમની બહેન પ્રિયંકા ગાંધી વાડ્રા સાથે સુરત એરપોર્ટ પર દેખાયા હતા.

કોર્ટે રાહુલ ગાંધીને બે વર્ષની જેલની ફટકારી છે સજા

સુરતમાં ચીફ જ્યુડિશિયલ મેજિસ્ટ્રેટ એચ.એચ. વર્માની કોર્ટે 23 માર્ચે રાહુલ ગાંધીને 'મોદી સરનેમ' વિશે કરેલી ટિપ્પણીના સંબંધમાં દાખલ કરાયેલ ફોજદારી માનહાનિના દાવામાં તેમને બે વર્ષની કેદની સજા ફટકારી હતી. કોર્ટે 52 વર્ષીય ગાંધીને ભારતીય દંડ સંહિતા (IPC)ની કલમ 499 (બદનક્ષી) અને 500 (વ્યક્તિની ફોજદારી બદનક્ષી માટે દોષિત વ્યક્તિ માટે સજા) હેઠળ દોષિત ઠેરવ્યા હતા. જો કે, કોર્ટે તે જ દિવસે ગાંધીને જામીન પણ આપ્યા હતા અને તેમની સજાના અમલ પર 30 દિવસ માટે રોક લગાવી દીધી હતી. જેથી તે ઉચ્ચ અદાલતમાં અપીલ દાખલ કરી શકે.