અમિતાભ બચ્ચને તેમનો બંગલો 'પ્રતીક્ષા' દીકરી શ્વેતાના નામે કર્યો, અહીં જ થયા હતા અભિષેક-ઐશ્વર્યાના લગ્ન

અમિતાભ બચ્ચનને બોલિવુડના શહેનશાહ કહેવામાં આવે છે. અમિતાભ બચ્ચને ફિલ્મી કરિયરની શરૂઆત 1969માં ફિલ્મ 'સાત હિન્દુસ્તાની'થી કરી હતી. જોકે, ઈન્ડસ્ટ્રીમાં તેમની ઓળખ એંગ્રી યંગ મેન તરીકેની બની હતી. દીવાર, ઝંઝીર, ડોન અને શોલે જેવી ફિલ્મોમાં કામ કરીને તેમણે મોટા પડદા પર ધમાલ મચાવી હતી. સાથે જ ફેન્સના દિલમાં જગ્યા બનાવી હતી. આજે 80ની ઉંમરે પણ અમિતાભ બચ્ચન ફિલ્મો અને ટીવીમાં કામ કરી રહ્યા છે. આ દરમિયાન બિગ બીની સંપત્તિને લઈને અહેવાલ આવ્યા છે. અમિતાભ બચ્ચને પોતાનો પ્રતીક્ષા નામનો બંગલો દીકરી શ્વેતાના નામે કરી દીધો છે.

મુંબઈના જૂહુ વિસ્તારમાં આવેલો બંગલો અમિતાભ બચ્ચન અને જયા બચ્ચને તેમની દીકરી શ્વેતા બચ્ચન નંદાને ભેટમાં આપી દીધો છે. ગિફ્ટ ડીડ થકી બંગલાની ઓવનરશીપ શ્વેતાના નામે ટ્રાન્સફર કરી દેવાઈ હતી. કુલ 16,840 સ્ક્વેર ફૂટમાં ફેલાયેલા બંગલાની ડીડ 8 નવેમ્બરે ટ્રાન્સફર થઈ હતી અને તેના બીજા દિવસે રજિસ્ટ્રેશન કરવામાં આવ્યું હતું.

બચ્ચન પરિવારે બંને ગિફ્ટ ડીડ પેટે કુલ 50.65 લાખ રૂપિયા સ્ટેમ્પ ડ્યૂટી ચૂકવી હતી, તેવી માહિતી Zapkey.comને પ્રાપ્ત થયેલા દસ્તાવેજોમાંથી બહાર આવી છે. શ્વેતા બચ્ચનને ગિફ્ટમાં અપાયેલા બંગલાની માર્કેટ વેલ્યૂ 50.63 કરોડ રૂપિયા હોવાનું કહેવામાં આવી રહ્યું છે. મુંબઈમાં હાલના નિયમ પ્રમાણે, પિતા તરફથી પુત્ર કે પુત્રીને રેસિડેન્શિયલ પ્રોપર્ટી ભેટ તરીકે આપવામાં આવે તો 200 રૂપિયા જેટલી સામાન્ય સ્ટેમ્પ ડ્યૂટી અને ડીડના 1 ટકા મેટ્રો સેસ ચૂકવવો પડે છે.

આ બંગલો બે પ્લોટ પર બનેલો છે. પહેલો પ્લોટ 9,585 સ્ક્વેર ફૂટનો છે, જેની સંયુક્ત માલિકી અમિતાભ બચ્ચન અને જયા બચ્ચનની છે. જ્યારે બીજો 7,255 સ્ક્વેર ફૂટનો પ્લોટ અમિતાભ બચ્ચનની એકલાની માલિકીનો છે. ઉલ્લેખનીય છે કે, જૂહુમાં આવેલા બગંલાઓ જલસા, પ્રતીક્ષા અને જનક સહિત બચ્ચન પરિવાર મુંબઈમાં કેટલીય સંપત્તિ ધરાવે છે. શ્વેતા બચ્ચનને ગિફ્ટમાં આપેલો બંગલો પ્રતીક્ષા એ જ છે જ્યાં 2007માં અભિષેક બચ્ચન અને ઐશ્વર્યા રાયના લગ્ન થયા હતા.