PSLV-C58 Launch: નવા વર્ષના પહેલા દિવસે સેટેલાઇટ લોન્ચ કરીને ઈતિહાસ રચશે ઈસરો, વૈજ્ઞાનિકો પહોંચ્યા વેંકટેશ્વર મંદિર

PSLV-C58 Launch: 2023માં ચંદ્રના દક્ષિણ ધ્રુવ પર ઉતરાણ અને સૌર મિશનના સફળ પ્રક્ષેપણ પછી, હવે નવા વર્ષનો પ્રથમ દિવસ એટલે કે 1 જાન્યુઆરી, 2024, ISRO માટે ખૂબ જ ખાસ રહેવાનો છે. ઈન્ડિયન સ્પેસ રિસર્ચ ઓર્ગેનાઈઝેશન (ISRO) વર્ષના પ્રથમ દિવસે વિશ્વનો બીજો અને દેશનો પ્રથમ આવો ઉપગ્રહ લોન્ચ કરવા જઈ રહ્યું છે, જે પલ્સર, બ્લેક હોલ, આકાશગંગા, રેડિયેશન વગેરેનો અભ્યાસ કરશે. તેનું નામ એક્સ-રે પોલારીમીટર સેટેલાઇટ (XPoSat) છે.

વેંકટેશ્વર મંદિરમાં વૈજ્ઞાનિકોએ કરી પૂજા અર્ચના

આ ઉપગ્રહનું આયુષ્ય પાંચ વર્ષનું છે. આ પરીક્ષણનું કાઉનડાઉન સવારે 8.10 વાગ્યાથી શરૂ થઈ ગયું છે. PSLV-C58 આવતીકાલે સવારે 9:10 વાગ્યે લોન્ચ થશે. આ પ્રક્ષેપણ પીએસએલવી રોકેટ સીરીઝનું 60મું પ્રક્ષેપણ છે.1 જાન્યુઆરીએ PSLV-C58 એક્સ-રે પોલારીમીટર સેટેલાઇટ (XPoSat) મિશન અને અન્ય 10 પેલોડ્સના પ્રક્ષેપણ પહેલા, ISROના વૈજ્ઞાનિકોએ તિરુપતિમાં ભગવાન વેંકટેશ્વરની પૂજા કરી હતી.

આ ઉપગ્રહ અવકાશમાં થતા રેડિયેશનનો અભ્યાસ કરશે. તેમના સ્ત્રોતોની તસવીરો લેશે. તેમાં લગાવવામાં આવેલ ટેલિસ્કોપ રામન સંશોધન સંસ્થા દ્વારા બનાવવામાં આવ્યું છે. આ ઉપગ્રહ બ્રહ્માંડના 50 બ્રાઇટ સોર્સને સ્ટડી કરશે. જેમ કે- પલ્સર, બ્લેક હોલ એક્સ-રે બાઈનરી, એક્ટિવ ગેલેક્ટીક ન્યુક્લી, નોન-થર્મલ સુપરનોવા. આ સેટેલાઇટ 650 કિલોમીટરની ઉંચાઈ પર તૈનાત કરવામાં આવશે. આ ઉપગ્રહમાં બે પેલોડ છે. પ્રથમ - POLIX અને બીજું - XSPECT.