CAA: લોકસભાની ચૂંટણી પહેલા લાગુ થશે નાગરિકતા સંશોધન કાયદો, આ છ સમુદાયના લોકો બની શકશે ભારતીય નાગરિક

CAA: દેશમાં લોકસભા ચૂંટણી પહેલા ‘સિટીઝનશિપ એમેન્ડમેન્ટ એક્ટ' (CAA)ના નિયમો અમલમાં આવશે. કેન્દ્ર સરકારના વિશ્વસનીય સૂત્રોએ આ માહિતી આપી છે. કેન્દ્રીય ગૃહ મંત્રાલયે આ મામલે પોતાનું હોમવર્ક પૂરું કરી લીધું છે. શક્ય છે કે જાન્યુઆરી અથવા ફેબ્રુઆરીમાં CAAના નિયમો અમલમાં આવે. નાગરિકતા સંશોધન કાયદાના નિયમો હેઠળ, ભારતના ત્રણ મુસ્લિમ પાડોશી દેશો, જેમાં પાકિસ્તાન, અફઘાનિસ્તાન અને બાંગ્લાદેશનો સમાવેશ થાય છે, તેના બિન-મુસ્લિમ ઇમિગ્રન્ટ્સ માટે ભારતીય નાગરિકતા મેળવવાના નિયમો સરળ બનશે. આ છ સમુદાયોમાં હિન્દુ, ખ્રિસ્તી, શીખ, જૈન, બૌદ્ધ અને પારસીનો સમાવેશ થાય છે.

નાગરિકતા સંશોધન બિલ 11 ડિસેમ્બર, 2019ના રોજ સંસદ દ્વારા પસાર કરવામાં આવ્યું હતું. આ બિલને માત્ર એક દિવસ પછી રાષ્ટ્રપતિની મંજૂરી મળી ગઈ. CAA દ્વારા, પાકિસ્તાન, બાંગ્લાદેશ અને અફઘાનિસ્તાનમાંથી હિન્દુ, શીખ, જૈન, બૌદ્ધ, પારસી અને ખ્રિસ્તી સમુદાયના લઘુમતીઓને ભારતીય નાગરિકતા મેળવવી સરળ બનશે. આવા લઘુમતીઓ 31 ડિસેમ્બર, 2014ના રોજ અથવા તે પહેલા ભારતમાં પ્રવેશ્યા છે. અગાઉ, ભારતીય નાગરિકતા પ્રાપ્ત કરવા માટે, વ્યક્તિએ ઓછામાં ઓછા 11 વર્ષ ભારતમાં રહેવું જરૂરી હતું. નાગરિકતા સંશોધન અધિનિયમ 2019 હેઠળ આ નિયમને સરળ બનાવવામાં આવ્યો છે. નાગરિકતા મેળવવાનો સમયગાળો 1 થી વધારીને 6 વર્ષ કરવામાં આવ્યો છે.

આ કાયદો હજી અમલમાં આવ્યો નથી કારણ કે CAA હેઠળ નિયમો બનાવવાના બાકી છે. રાજ્યસભા અને લોકસભામાં ગૌણ કાયદા પરની સંસદીય સમિતિઓએ કેન્દ્રીય ગૃહ મંત્રાલયને અનુક્રમે 31 ડિસેમ્બર, 2022 અને 9 જાન્યુઆરી, 2023 સુધી વિસ્તરણ આપ્યું હતું. આ પછી, સંસદીય સમિતિઓએ ફરીથી વિસ્તરણને મંજૂરી આપી.

CAAને લઈને દેશમાં તીવ્ર પ્રતિક્રિયાઓ જોવા મળી હતી. અનેક રાજકીય પક્ષોએ તેનો વિરોધ પણ કર્યો હતો. તે સમયે કેન્દ્ર સરકારે તેનો અમલ કરવાનો નિર્ણય લીધો હતો, પરંતુ કોરોનાને કારણે CAA અવઢવમાં રહ્યું હતું. આ મામલે સુપ્રીમ કોર્ટમાં 200થી વધુ જાહેર હિતની અરજીઓ દાખલ કરવામાં આવી હતી. આ બધા વચ્ચે કેન્દ્રીય ગૃહ પ્રધાન અમિત શાહ કહેતા રહ્યા કે CAA દરેક પરિસ્થિતિમાં લાગુ કરવામાં આવશે. કોવિડ-19 રોગચાળાને કારણે આ અધિનિયમનો અમલ કરવામાં વિલંબ થયો છે. જેઓ વિચારે છે કે આવું નહીં થાય તે ખોટા સાબિત થશે.