Budget 2023: ઇલેક્ટ્રિક વ્હીકલ્સ થશે વધુ સસ્તા, FM સીતારમણે બેટરી પર પણ સબસિડી વધારવાની કરી જાહેરાત

Union Budget 2023: ઇલેક્ટ્રિક વાહનો ટૂંક સમયમાં સસ્તા થતા જોવા મળી શકે છે. બજેટમાં, કેન્દ્રીય નાણાં પ્રધાન નિર્મલા સીતારમણે દેશમાં લિથિયમ-આયન સેલ બેટરીનું ઉત્પાદન વધારવા પર ભાર મૂક્યો હતો અને આ માટે બેટરી સંબંધિત કેપિટલ ગુડ્સ/મશીનરી પરની કસ્ટમ ડ્યુટી દૂર કરવાની જાહેરાત કરી હતી. આ સાથે જ નાણામંત્રી દ્વારા ઇલેક્ટ્રિક બેટરી પરની સબસિડી પણ વધુ એક વર્ષ માટે લંબાવવામાં આવી છે. તેનાથી ઈલેક્ટ્રિક વાહનો સસ્તા થવાનો રસ્તો સાફ થઈ ગયો છે. તેમના બજેટ ભાષણમાં, નાણામંત્રીએ માહિતી આપી હતી કે, લિથિયમ-આયન સેલ બેટરી પરના રાહત કસ્ટમ ડ્યુટી દર આગામી નાણાકીય વર્ષમાં પણ ચાલુ રાખવામાં આવશે.

મહત્વનું છે કે, ઇલેક્ટ્રિક વાહનો આ લિથિયમ-આયન સેલની બેટરી પર ચાલે છે. આ સિવાય સરકારે "ફેમ સ્કીમ" માટે બજેટની રકમ પણ બમણી કરી દીધી છે.

મે 2021માં પ્રથમ વખત કેન્દ્ર સરકારે દેશમાં લિથિયમ-આયન સેલ બેટરીના ઉત્પાદનને પ્રોત્સાહન આપવા માટે પ્રોડક્શન લિંક્ડ ઇન્સેન્ટિવ (PLI) સ્કીમની જાહેરાત કરી હતી. PLI યોજનાનો હેતુ ઇલેક્ટ્રિક વાહનો સાથે સંકળાયેલા મુખ્ય ઘટકોની કિંમત ઘટાડવાનો હતો. ઇલેક્ટ્રિક વાહનો પરનો GST પણ 12 ટકાથી ઘટાડીને 5 ટકા કરવામાં આવ્યો છે.

બજેટ ભાષણમાં, સીતારમણે કહ્યું, "ઓછા ઉત્સર્જનના પરિવહનના ઉપયોગને પ્રોત્સાહન આપવા માટે, કેપિટલ ગુડ્સની આયાત માટે કસ્ટમ ડ્યુટી મુક્તિ લંબાવવામાં આવી રહી છે, ઇલેક્ટ્રિક વાહનોમાં વપરાતી બેટરીના ઉત્પાદનમાં સામેલ મશીનરી."

સીતારમણે કહ્યું કે, બજેટ 2023માં 7 મુખ્ય પ્રાથમિકતાઓ છે. પ્રાથમિકતાઓમાંની એક ગ્રીન ડેવલપમેન્ટ છે, જે અંતર્ગત સ્વચ્છ ઉર્જાનો ઉપયોગ વધારવા અને કાર્બન ફૂટપ્રિન્ટ ઘટાડવા પર ભાર મૂકવામાં આવશે.