બજેટ 2023: EV પરના GSTમાં ઘટાડો અને પાર્ટસ પર ઈમ્પોર્ટ ડ્યૂટી ઘટાડાની જાહેરાત કરી શકે નાણામંત્રી

બજેટ 2023: નાણામંત્રી નિર્મલા સીતારમણ આગામી કેન્દ્રીય બજેટ 2023માં ઇલેક્ટ્રિક વ્હીકલ માટે મોટી જાહેરાતો કરી શકે છે. સરકાર ઈવીનો ઉપયોગ વધારવા પર ભાર આપી રહી છે. નિષ્ણાતો કહે છે કે દેશમાં EVનો ઉપયોગ વધારવા માટે અનેક પગલાં ભરવાની જરૂર છે. આગામી બજેટ આ માટે મોટી તક બની શકે છે. એવું માનવામાં આવે છે કે નાણામંત્રી ભારતમાં ઈવીના ઉત્પાદનને પ્રોત્સાહન આપવા માટે પ્રોત્સાહનમાં વધારો કરી શકે છે. તેનાથી ઈવીના ઉત્પાદનમાં કંપનીઓનો રસ વધશે.

એનર્જી સ્ટોરેજ સિસ્ટમ માટે મોટી જાહેરાતો થશે
સરકાર એનર્જી સ્ટોરેજ સિસ્ટમ (ESS) માટે પણ મોટી જાહેરાતો કરી શકે છે. ખરેખર, ઈવીનો ઉપયોગ ત્યારે જ વધશે જ્યારે બેટરી અને ચાર્જિંગ સંબંધિત ઈન્ફ્રાસ્ટ્રક્ચર વધુ સારું હશે. ગયા બજેટમાં નાણામંત્રીએ બેટરી સ્વેપિંગ પોલિસીની જાહેરાત કરી હતી. આ અંગે અંતિમ માર્ગદર્શિકા આવવાની છે.

ઈવી પાર્ટસ પર ઈમ્પોર્ટ ડ્યુટી ઘટાડવામાં આવશે
ઇલેક્ટ્રિક વ્હીકલના ઉત્પાદન સાથે સંકળાયેલા સૂત્રોએ જણાવ્યું હતું કે સરકાર ઇવી અને બેટરીના ઉત્પાદનમાં ઉપયોગમાં લેવાતા ભાગો પરની આયાત ડ્યુટી ઘટાડવાનું વિચારી રહી છે. ખાસ કરીને લિથિયમ-આયન બેટરીના ઉત્પાદનમાં વપરાતા ભાગો પર આયાત જકાત ઘટાડવાની યોજના છે. 1 ફેબ્રુઆરી, 2023ના રોજ રજૂ થનારા કેન્દ્રીય બજેટમાં તેની જાહેરાત થઈ શકે છે. EV ઉદ્યોગના પ્રતિનિધિઓએ સરકારને સિન્થેટિક સેપરેટર્સ, એનોડ અને કેથોડ્સ પર ટેક્સ ઘટાડવાની સલાહ આપી છે. આ વર્ષે એપ્રિલથી સપ્ટેમ્બર દરમિયાન 1.32 અબજ ડોલરની લિથિયમ-આયન બેટરીની આયાત કરવામાં આવી હતી.

PLI યોજના હેઠળ ફાળવણી વધી શકે છે
સરકારે ઓટોમોબાઈલ અને ઓટો પાર્ટ્સ ઉત્પાદન ક્ષેત્ર માટે PLI યોજના હેઠળ રૂ. 25,938 કરોડના પ્રોત્સાહનની જાહેરાત કરી છે. નિષ્ણાતો કહે છે કે આ પ્રોત્સાહનમાં EV ઉદ્યોગ પણ સામેલ છે. EVમાં વપરાતી બેટરીના ઉત્પાદનને પ્રોત્સાહન આપવા માટે, PLI હેઠળ રૂ. 18,100 કરોડના પ્રોત્સાહનની જાહેરાત કરવામાં આવી છે. દેશમાં બેટરીનું ઉત્પાદન વધવાથી તેની કિંમતમાં ઘટાડો થશે. આનાથી EVની કિંમતમાં પણ ઘટાડો થશે.

આ પણ વાંચો - GST કાઉન્સિલઃ શું પાન મસાલા-ગુટખા પર લાગશે વધારાનો ટેક્સ? નિર્મલા સીતારમણે કહી આ વાત

GST દરમાં ઘટાડો અપેક્ષિત
સરકારે ઇલેક્ટ્રિક વ્હીકલ પર GST 12 ટકાથી ઘટાડીને 5 ટકા કર્યો છે. ચાર્જર અને ચાર્જિંગ સ્ટેશન પર GST 18 ટકાથી ઘટાડીને 12 ટકા કરવામાં આવ્યો છે. નિષ્ણાતોનું કહેવું છે કે સરકારે ઈવી પર ટેક્સ મુક્તિની જાહેરાત કરવી જોઈએ. ઉપરાંત, ચાર્જિંગ સ્ટેશન અને ચાર્જર પરના GST દરમાં વધુ ઘટાડો કરવાની જરૂર છે. આગામી બજેટમાં સરકાર રાજ્યોને ઈવીના ઉપયોગને પ્રોત્સાહિત કરવા રોડ ટેક્સ સહિત અન્ય છૂટ આપવાનું કહી શકે છે.