સરકારી બેન્કોના ક્રેડિટ કાર્ડનું NPA બમણું, 9 થી 18 ટકા: RBI રિપોર્ટ

નાણાકીય વર્ષ 2023માં જાહેર ક્ષેત્રની બેન્કોના ક્રેડિટ કાર્ડ સેગમેન્ટની નોન-પર્ફોર્મિંગ એસેટ્સ (NPA) વધીને 18 ટકા થઈ ગઈ છે. એક વર્ષ પહેલા જાહેર ક્ષેત્રની બેન્કોના ક્રેડિટ કાર્ડ દ્વારા એનપીએ 9 ટકા હતી. રિઝર્વ બેન્ક ઓફ ઈન્ડિયા (RBI)ના ફાઈનાન્શિયલ સ્ટેબિલિટી રિપોર્ટમાં આપવામાં આવેલા ડેટા પરથી આ માહિતી મળી છે. "પર્સનલ લોન સેગમેન્ટની એસેટ ક્વોલિટી સુધરી છે. જો કે, ક્રેડિટ કાર્ડ સેગમેન્ટમાં ક્ષતિ નજીવી રીતે વધી છે," રિપોર્ટમાં જણાવાયું છે. રિપોર્ટમાં આપવામાં આવેલ ડેટા દર્શાવે છે કે ક્રેડિટ કાર્ડની NPA માર્ચ 2022માં 9 ટકા હતી, જે માર્ચ 2023માં વધીને 18 ટકા થઈ ગઈ છે.

બેન્કોની કુલ NPA દાયકાની નીચી સપાટીએ

આરબીઆઈએ કહ્યું કે આ વર્ષે માર્ચમાં બેન્કોનો એનપીએ રેશિયો ઘટીને 3.9 ટકા થઈ ગયો છે, જે એક દાયકામાં સૌથી નીચો સ્તર છે. સેન્ટ્રલ બેન્કે જણાવ્યું હતું કે આ નાણાકીય વર્ષના અંત સુધીમાં વ્યાપારી બેન્કોની ગ્રોસ એનપીએ વધુ ઘટીને 3.6 ટકા થવાની ધારણા છે.

આરબીઆઈના ગવર્નર શક્તિકાંત દાસે અહેવાલનો પ્રસ્તાવના લખતાં જણાવ્યું હતું કે, "ભારતમાં નાણાકીય ક્ષેત્ર સ્થિર અને મજબૂત રહ્યું છે, જે બેન્ક ધિરાણમાં સતત વૃદ્ધિ, એનપીએના નીચા સ્તર અને પર્યાપ્ત મૂડી અને તરલતા અનામતમાં પ્રતિબિંબિત થાય છે."