ભારતીય મૂળના અજય બંગા વિશ્વ બેન્કના નવા પ્રમુખ તરીકે ચૂંટાયા, 2 જૂને કાર્યભાર સંભાળશે

ભારતીય મૂળના અજય બંગા વિશ્વ બેન્કના આગામી પ્રમુખ બનશે. વિશ્વ બેન્કના 25 સભ્યોના બોર્ડે બુધવારે 3 મેના રોજ તેમના નામને મંજૂરી આપી હતી. અજય બંગા 2 જૂને વર્લ્ડ બેન્કનો ચાર્જ સંભાળશે અને તેમનો કાર્યકાળ 5 વર્ષનો રહેશે. મળતી માહિતી મુજબ અજય બંગા આ પદ માટે બિનહરીફ ચૂંટાયા છે. બંગા અગાઉ માસ્ટરકાર્ડના ભૂતપૂર્વ સીઈઓ હતા. બંગા ફાઇનાન્સ અને ડેવલપમેન્ટમાં બહોળો અનુભવ લાવે છે અને તેને ક્લાઇમેટ ચેન્જ અને અન્ય વૈશ્વિક પડકારોનો સામનો કરવા માટે વિશ્વ બેન્કને મજબૂત બનાવવાનું કામ સોંપવામાં આવ્યું છે.

યુએસ પ્રમુખ જો બિડેને ફેબ્રુઆરીના અંતમાં વિશ્વ બેન્કના પ્રમુખ પદ માટે અજય બંગાને નોમિનેટ કર્યા હતા. બિડેને તે સમયે કહ્યું હતું કે, "ઇતિહાસના આ નિર્ણાયક સમયે વિશ્વ બેન્કનું નેતૃત્વ કરવા માટે બંગા એકદમ યોગ્ય વ્યક્તિ છે." તેમણે ઉમેર્યું, "આપણા સમયના સૌથી વધુ મહત્ત્વના પડકારો, જેમ કે આબોહવા પરિવર્તનનો સામનો કરવા માટે જાહેર અને ખાનગી સંસાધનોને એકત્રીત કરવાનો બંગા પાસે નોંધપાત્ર અનુભવ છે," તેમણે ઉમેર્યું.

બંગા 2 જૂને ડેવિડ માલપાસનું સ્થાન લેશે. ડેવિડ અર્થશાસ્ત્રી અને ભૂતપૂર્વ યુએસ ટ્રેઝરી અધિકારી છે. તેમની નિમણૂક અમેરિકાના ભૂતપૂર્વ રાષ્ટ્રપતિ ડોનાલ્ડ ટ્રમ્પના કાર્યકાળ દરમિયાન કરવામાં આવી હતી. માલપાસનો કાર્યકાળ હજુ 2024 સુધી બાકી હતો, પરંતુ તેણે અંગત કારણોસર આ પદ છોડવાનો નિર્ણય કરી લીધો છે.

જાણો કોણ છે અજય બંગા