રિલાયન્સ જિયોએ માર્ચમાં 30.5 લાખ કસ્ટમર્સ ઉમેર્યા, પરંતુ 12 લાખ કસ્ટમર્સએ છોડ્યો વોડા આઈડિયાનો સાથ

દેશની સૌથી મોટી ટેલિકોમ કંપની રિલાયન્સ જિયોએ માર્ચમાં 30.5 લાખ નવા મોબાઈલ કસ્ટમર્સ ઉમેર્યા, જ્યારે 12.2 લાખ કસ્ટમર્સએ વોડાફોન આઈડિયા છોડી દીધી. ટેલિકોમ રેગ્યુલેટરી ઓથોરિટી ઓફ ઈન્ડિયા (TRAI) એ સોમવારે જાહેર કરાયેલા માર્ચ મહિનાના આંકડામાં આ માહિતી આપી હતી. આ મુજબ, માર્ચમાં 30.5 લાખ નવા કસ્ટમર્સના ઉમેરા સાથે, Jioના કસ્ટમર્સની સંખ્યા વધીને 430 મિલિયનથી વધુ થઈ ગઈ છે.

ભારતી એરટેલ મહિના દરમિયાન 10.37 લાખ નવા કસ્ટમર્સ ઉમેરવામાં પણ સફળ રહી. આ રીતે એરટેલના કુલ કસ્ટમર્સની સંખ્યા વધીને 37.09 કરોડ થઈ ગઈ છે. બીજી તરફ વોડાફોન આઈડિયાએ માર્ચમાં 12.12 લાખ મોબાઈલ કસ્ટમર્સ ગુમાવ્યા છે. આ સાથે કંપનીનો કસ્ટમર આધાર ઘટીને 23.67 કરોડ થયો છે.

બ્રોડબેન્ડ કસ્ટમર્સની સંખ્યામાં પણ વધારો

માર્ચમાં, બ્રોડબેન્ડ કસ્ટમર્સની કુલ સંખ્યામાં ફેબ્રુઆરીની સરખામણીમાં 0.86 ટકાનો વધારો નોંધાયો હતો. માર્ચમાં આ સંખ્યા વધીને 84.65 કરોડ થઈ હતી જ્યારે ફેબ્રુઆરીમાં 83.93 કરોડ બ્રોડબેન્ડ કસ્ટમર્સ હતા. ટોચના પાંચ સેવા પ્રદાતાઓનો કુલ બ્રોડબેન્ડ બજાર હિસ્સો 98.37 ટકા હતો. આમાં, રિલાયન્સ જિયો ઇન્ફોકોમ 43.85 કરોડ કસ્ટમર્સ સાથે મોખરે છે જ્યારે ભારતી એરટેલ 24.19 કરોડ કસ્ટમર્સ ધરાવે છે. વોડાફોન આઈડિયાના બ્રોડબેન્ડ કસ્ટમર્સની સંખ્યા 12.48 કરોડ હતી.