Rahul Gandhi: ‘લોકસભા ચૂંટણી બાદ રાહુલ ગાંધીની થશે ધરપકડ', હિમંતા બિસ્વા સરમાએ કર્યો દાવો

Rahul Gandhi: આસામના મુખ્યમંત્રી હિમંતા બિસ્વા સરમાએ દાવો કર્યો હતો કે કોંગ્રેસ નેતા રાહુલ ગાંધીની લોકસભા ચૂંટણી પછી ધરપકડ કરવામાં આવશે. રાજ્યમાં હિંસા ભડકાવવા બદલ રાહુલ વિરુદ્ધ FIR નોંધવામાં આવી છે.

વાસ્તવમાં આસામ પોલીસે મંગળવારે કોંગ્રેસની ‘ભારત જોડો ન્યાય યાત્રા' દરમિયાન હિંસા ભડકાવવાના આરોપમાં રાહુલ ગાંધી, કેસી વેણુગોપાલ, કન્હૈયા કુમાર અને પાર્ટીના અન્ય ઘણા નેતાઓ વિરુદ્ધ સુઓ મોટુ એફઆઈઆર નોંધી હતી.

સરમાએ સિબસાગર જિલ્લાના નઝીરામાં એક કાર્યક્રમ દરમિયાન કહ્યું કે અમે એફઆઈઆર નોંધી છે. સ્પેશિયલ ઇન્વેસ્ટિગેશન ટીમ તપાસ કરશે અને લોકસભા ચૂંટણી બાદ રાહુલની ધરપકડ કરવામાં આવશે. તમને જણાવી દઈએ કે લોકસભાની ચૂંટણી થોડા મહિનામાં યોજાવાની છે.

આસામના પોલીસ મહાનિર્દેશક જી.પી. સિંહે જણાવ્યું હતું કે અધિક પોલીસ મહાનિર્દેશક (સીઆઈડી) દ્વારા રચાયેલ એસઆઈટી દ્વારા સંપૂર્ણ તપાસ માટે આ કેસ આસામ સીઆઈડીને ટ્રાન્સફર કરવામાં આવ્યો છે. અગાઉ, મુખ્યમંત્રીએ રાજ્યના પોલીસ મહાનિર્દેશકને બેરિકેડ તોડવા માટે ભીડને ઉશ્કેરવા બદલ રાહુલ ગાંધી સામે કેસ નોંધવાનો નિર્દેશ આપ્યો હતો.