Driverless Cars in india: ‘80 લાખ ડ્રાઈવરોની રોજગારી છીનવાઈ જશે', ડ્રાઈવર વિનાની કાર ભારતમાં નહીં આવે - નીતિન ગડકરી

Driverless Cars in india: કેન્દ્રીય રોડ ટ્રાન્સપોર્ટ અને હાઈવે મંત્રી નીતિન ગડકરીએ ફરી એકવાર સ્પષ્ટ કર્યું છે કે ભારતમાં ડ્રાઈવર વિનાની કે ઓટોનોમસ કાર લોન્ચ કરવામાં આવશે નહીં. IIM નાગપુર દ્વારા આયોજિત 'ઝીરો માઈલ' ઈવેન્ટ દરમિયાન બોલતા કેન્દ્રીય મંત્રી નીતિન ગડકરીએ કહ્યું, "જ્યાં સુધી હું મંત્રી છું ત્યાં સુધી ભારતમાં ડ્રાઈવર વિનાની કારને લોન્ચ કરવાની મંજૂરી આપવામાં આવશે નહીં."

ઇવેન્ટ દરમિયાન, નીતિન ગડકરીએ ઓટોમોબાઇલ એન્જિનિયરિંગમાં ફેરફારો પર ભાર મૂક્યો હતો, જેમ કે કારમાં છ એરબેગ્સનો સમાવેશ, રસ્તા પરના બ્લેક સ્પોટ ઘટાડવા અને મોટર વ્હીકલ એક્ટ દ્વારા દંડ વધારવો વગેરે. તેમણે કહ્યું, "અમે મોટર વ્હીકલ એક્ટ દ્વારા દંડ વધાર્યો છે, એમ્બ્યુલન્સ અને ક્રેન્સ મૂકી છે જેથી કરીને અહીંથી વસ્તુઓ સારી થાય, અમે દર વર્ષે જાગૃતિ પણ વધારીએ છીએ."

ડ્રાઈવર વિનાની કાર ભારતમાં નહીં આવે

એક પ્રશ્ન પર નીતિન ગડકરીએ કહ્યું, "હું ક્યારેય ડ્રાઈવર વિનાની કારને ભારતમાં આવવાની મંજૂરી આપીશ નહીં કારણ કે તેનાથી 70 થી 80 લાખ ડ્રાઈવરોની રોજગારી ખતમ થઈ જશે અને હું આવું થવા દઈશ નહીં." એ પણ સ્પષ્ટ કર્યું કે ટેસ્લાનું ભારતમાં સ્વાગત છે. પરંતુ ચીનમાં ઉત્પાદન ભારતમાં વેચાણ માટે સ્વીકાર્ય નથી. તેમણે કહ્યું, "અમે ટેસ્લાને ભારતમાં આવવાની મંજૂરી આપીશું પરંતુ તેઓ તેને ચીનમાં બનાવી શકશે નહીં અને ભારતમાં વેચી શકશે નહીં. આવું થવું અશક્ય છે."