Budget 2023: નાણામંત્રી નિર્મલા સીતારમણની જાહેરાત સાથે ટીવીની કિંમતમાં 3000 રૂપિયાનો થશે ઘટાડો

Budget 2023: ભારતમાં બનેલા ટેલિવિઝન (TV)ના ભાવમાં 3,000 રૂપિયાનો ઘટાડો કરવામાં આવશે. મહત્વનું છે કે, 1 ફેબ્રુઆરીના રોજ નાણામંત્રી નિર્મલા સીતારમણે ટીવીમાં ઉપયોગમાં લેવાતા આયાતી ભાગો પર બેઝિક કસ્ટમ ડ્યુટી (BCD)માં ઘટાડો કરવાની જાહેરાત કરી હતી. BCD 5 ટકાથી ઘટાડીને 2.5 ટકા કરવામાં આવ્યો છે. ઓપન સેલ્સ પાર્ટ્સ પર કસ્ટમ ડ્યુટીમાં ઘટાડો થવાથી ટીવીની કિંમતમાં લગભગ 5 ટકાનો ઘટાડો થશે. ઉદ્યોગ સાથે સંકળાયેલા સૂત્રોએ આ માહિતી આપી છે. ઓપન સેલ પેનલ LED ટીવી સેટ બનાવવાના કુલ ખર્ચના 60-70 ટકા હિસ્સો ધરાવે છે.

ઓપન સેલ્સના પાર્ટસ પર બેઝિક કસ્ટમ ડ્યુટીમાં ઘટાડો

નિર્મલા સીતારમણે બજેટ ભાષણમાં જણાવ્યું હતું કે ટેલિવિઝનના ઉત્પાદનમાં મૂલ્યવૃદ્ધિને પ્રોત્સાહન આપવા માટે, હું ટીવી પેનલના ખુલ્લા વેચાણ ભાગો પરની મૂળભૂત કસ્ટમ ડ્યુટી ઘટાડીને 2.5 ટકા કરવાનો પ્રસ્તાવ મૂકું છું. કન્ઝ્યુમર ઈલેક્ટ્રોનિક્સ એન્ડ એપ્લાયન્સીસ મેન્યુફેક્ચરર્સ એસોસિએશન (સીઈએએમએ)ના પ્રમુખ એરિક બ્રાગાન્ઝાએ જણાવ્યું હતું કે આ પગલું સેક્ટરના વિકાસને વેગ આપશે. આ સાથે સ્થાનિક મૂલ્યવૃદ્ધિમાં પણ મદદ મળશે.

ટીવીની કિંમતમાં 5 ટકાનો થશે ઘટાડો

બ્રાગેન્ઝાએ કહ્યું કે, ઉદ્યોગ માટે આ એક સારું પગલું છે. મોટાભાગની કંપનીઓ આનો લાભ ગ્રાહકો સુધી પહોંચાડવાનો પ્રયાસ કરશે. સુપર પ્લાસ્ટ્રોનિક પ્રાઇવેટ લિમિટેડે કહ્યું છે કે, કસ્ટમ ડ્યુટી ઘટાડીને 2.5 ટકા કરવાને કારણે ટીવી સેટની અંતિમ કિંમતમાં 5 ટકાનો ઘટાડો થશે. કંપની થોમસન, કોડક, વેસ્ટિંગહાઉસ અને બ્લુપંકટ જેવી આંતરરાષ્ટ્રીય બ્રાન્ડનું ઉત્પાદન કરે છે.

ઉદ્યોગોને પણ થશે ફાયદો

SSPLના CEO અને સ્થાપક અવનીત સિંહ મારવાહે કહ્યું કે ભારત સરકારનું આ એક આવકારદાયક પગલું છે. અમે આ લાભ ગ્રાહકો સુધી પહોંચાડીશું. આ કારણે મોટી સ્ક્રીનવાળા ટીવી સેટની કિંમતમાં 3000 રૂપિયાનો ઘટાડો થશે. સોની ઈન્ડિયાના મેનેજિંગ ડિરેક્ટર સુનિલ નાયરે પણ કહ્યું હતું કે ટીવી ઉત્પાદનમાં ઉપયોગમાં લેવાતા કેટલાક ટીવી પાર્ટ્સ પરની આયાત ડ્યૂટીમાં ઘટાડો કરવાથી ઉદ્યોગને પ્રોત્સાહન મળશે.