કોમોડિટી લાઈવ: ક્રૂડમાં આવ્યો 3%નો ઘટાડો, સોના-ચાંદીમાં નીચલા સ્તરેથી રિકવરી

ગઈકાલના ઘટાડા બાદ આજે સોનામાં ફરી રિકવરી જોવા મળી, જ્યાં comex પર કિંમતો 2033ના સ્તરની પાસે રહી, તો સ્થાનિક બજારમાં 62,251ના સ્તરની આસપાસ કારોબાર જોવા મળી રહ્યો છે. ડૉલર ઇન્ડેક્સમાં આવેલા ઘટાડાના કારણે સોનાની કિંમતોને સપોર્ટ મળ્યો, પણ ઉલ્લેખનિય છે કે નવેમ્બર મહિનામાં RBIની ગોલ્ડ હોલ્ડિંગ્સ 3.1 ટનથી ઘટીને 803.6 ટન પર પહોંચતી દેખાઈ.

ચાંદીમાં પણ રિકવરી આવતા વૈશ્વિક બજારમાં 23 ડૉલરની ઉપર કારોબાર રહ્યો, જ્યારે સ્થાનિક બજારમાં 72,490ના સ્તરની પાસે કિંમતો પહોંચતી દેખાઈ.

શરૂઆતી કારોબારમાં સ્થાનિક બજારમાં બેઝ મેટલ્સ તરફથી પોઝિટીવ સંકેતો મળ્યા હતા, LME પર પણ ચાઈનામાં ઓછી ઇન્વેન્ટરીના કારણે કિંમતોને સપોર્ટ મળતા કોપરમાં રિકવરી જોવા મળી. આ સાથે જ ડૉલર ઇન્ડેક્સમાં દબાણની પણ અસર મેટલ્સની ચાલ પર દેખાઈ રહી છે.

ક્રૂડમાં ફરી સપ્લાય વધતા કિંમતો પર દબાણ બન્યું, જ્યાં બ્રેન્ટના ભાવ 76 ડૉલરની પાસે આવ્યા, તો NYMEX ક્રૂડમાં 70 ડૉલરની આસપાસ કામકાજ જોવા મળી રહ્યું છે. ઉલ્લેખનિય છે કે, ડિસેમ્બરમાં OPECએ આઉટપુટ 70,000 bpdથી વધાર્યું, તો અંગોલા, ઇરાક અને નાઈજેરીયા તરફથી પણ ક્રૂડ ઓઈલનું આઉટપુટ વધ્યું છે, પણ સામે માગ નબળી રહેવાના કારણે કિંમતો ઘટતી દેખાઈ.