BDMC: મુંબઈના વર્લી વિસ્તારમાં બોમ્બે ડાઈંગ 22 એકર જમીન વેચશે, 5,200 કરોડમાં સોદો

BDMC: બોમ્બે ડાઈંગ એન્ડ મેન્યુફેક્ચરિંગ કંપની લિમિટેડ (BDMC) એ 13 સપ્ટેમ્બરે જણાવ્યું હતું કે કંપનીના બોર્ડ ઓફ ડિરેક્ટર્સે મુંબઈના વરલી વિસ્તારમાં સ્થિત 22 એકર પ્લોટના વેચાણને મંજૂરી આપી છે. આ પ્લોટ જાપાનની કંપની સુમિતોમો રિયલ્ટી એન્ડ ડેવલપમેન્ટ કંપની લિમિટેડની પેટાકંપની ગોઈસુ રિયલ્ટી પ્રાઈવેટ લિમિટેડને બે તબક્કામાં વેચવામાં આવશે. આ ડીલ 5,200 કરોડ રૂપિયામાં થઈ છે.

બોમ્બે ડાઈંગ દ્વારા જારી કરવામાં આવેલા નિવેદનમાં કહેવામાં આવ્યું છે કે આ ડીલ માટે શેરધારકોની મંજૂરી પણ જરૂરી છે. કંપનીના નિવેદન મુજબ, 'શેરધારકોની મંજૂરી પછી, BDMC પ્રથમ તબક્કામાં ખરીદનાર પાસેથી 4,675 કરોડ રૂપિયા પ્રાપ્ત કરશે. બાકીના રૂપિયા 525 કરોડ અમુક શરતોને પૂર્ણ કર્યા બાદ અને બીજા તબક્કાને લગતા કરારો પૂર્ણ થયા બાદ BDMC દ્વારા આપવામાં આવશે.

BDMCના ચેરમેન નુસ્લી વાડિયાએ જણાવ્યું હતું કે, 'મને એ જણાવતા ખૂબ જ આનંદ થાય છે કે BDMC એ સુમિતોમો ગ્રુપ સાથે 22 એકર જમીન (તેની સાથે જોડાયેલ ફ્લોર સ્પેસ ઇન્ડેક્સ (FSI) સહિત)ના વેચાણ માટે કરાર પર હસ્તાક્ષર કર્યા છે. આ ડીલ 5,200 કરોડ રૂપિયામાં થઈ છે.

વાડિયાએ જણાવ્યું હતું કે, 'એકવાર પ્રસ્તાવિત ટ્રાન્ઝેક્શન પૂર્ણ થઈ જાય પછી, કંપનીને રૂપિયા 4,300 કરોડથી વધુનો કર પૂર્વેનો નફો મળશે અને કંપની તેના તમામ દેવાની ચૂકવણી કરશે, જેથી તેને વ્યાજની ચૂકવણી પર ખર્ચ કરવો નહીં પડે.'